Oroz Arizcuren, Francisco J. La lírica religiosa en la literatura provenzal antigua. Pamplona: Excma. Diputación Foral de Navarra - Institución Príncipe de Viana, 1972.

Edición crítica, traducción, notas y glosario. Versión revisada para Corpus des Troubadours, 2011.

Code: 323,016 Auteur: Peire d'Alvernha Genre: Vers Numero: XLI

Dieus, vera vida, verays

I	1	Dieus, vera vida, verays
		e dreitz endrech clers e lays,
	3	e nomnatz salvair’e Cristz
		en lati e sobr’ebrays,
		e natz e pueys mortz vius vistz;
	6	e sors etz, don laisses tristz
		aquels que pueys fezes iauzens:
II		Senher reis, ieu falhi fals
	9	–don es yssitz tan grans mals–
		en cossir et en ditz durs,
		et en fols faitz infernals
	12	ab brondis d’estranhs aturs,
		et en tals talans tafurs:
		mi·us ren colpables, penedens,
III	15	De tot so qu’ieu fesi anc;
		e si non ai cor ferm franc
		de dir so que m’agra ops,
	18	prec a vos, al cal me·n planc,
		per cui tan fon fizels Iops,
		que non guardetz mos tortz trops,
	21	mas gracïa·m sia sufrens.
IV		Qu’ieu no·m sen si savis sai
		que puesca conquerre lay
	24	lo regn’on hom set ni fam
		ni freg non a ni esmay,
		si·l vostra vertutz cuy clam
	27	no·m don’esfortz qu’ieu dezam
		lo ioy d’aquest segle giquens,
V		Que·m fai falhir ves vos sol,
	30	per que·l cors m’intr’en tremol;
		e si·m servatz mos forfaitz
		tro lai al derrier tribol,
	33	qu’enans no·ls m’ajatz fag fraitz,
		senher, ges bons no·m n’es plaitz,
		si doncs merces no·ls sobrevens
VI	36	De vos qu’estorsest Sidrac
		d’ardr’en la flam’e Misac
		essems [ab]Abdenago,
	39	e Danïel dins del lac
		e Jonas ab utero
		e·ls tres rics reys contr’Hero
	42	e Suzan’ entre·ls fals guirens;
VII		E paguetz, senher sobrans,
		tans de dos peys e cinc pans;
	45	e·l Lazer suscites vos
		qu’era ia quatriduans;
		de vos ac per bel respos
	48	son ser salv centurios,
		e gitetz del mon mans turmens.
VIII		E fezetz de l’aigua vi
	51	al covit d’archetricli
		ed autres meravils moutz
		don hom carnals no sap fi,
	54	ni no·us en mostretz estoutz;
		e parlet per vos lo voutz
		de Luca, rics reys resplandens.
IX	57	E fezetz la terr’ e·l tro
		e tot quant es ni anc fo
		d’un sol seing el sol el cel;
	60	e confondetz Farao,
		e detz als filhs d’Israel
		lach e bresca, mann’e mel;
	63	e dampnes ab serpen serpens,
X		C’als vostres fon requies
		quan vos plac que Moyzes
	66	l’yssausses lai el dezert;
		e solses las mas e·ls pes
		–quant us angels l’ac espert–
	69	sanh Peir’e·l fezes obert
		dels vostres destrics destreignens;
XI		E·us queric la dura plebs
	72	tro lai on es mons Orebs;
		aucien dinz Bethleem
		–qan vos en fugi Iozeps
	75	en Egipte, so sabem–,
		e pueys en Iheruzalem
		venguetz, e’ntre·ls vostres parens
XII	78	A Nazare. Reys Ihesus,
		Pair’en tres personas us
		e Filhs e sanhs Esperitz:
	81	vos prec en trinitat sus,
		–qu’es cims e rams e razitz
		e Dieus e de quant qu’es guitz–
	84	que·m siatz, si·us platz, defendens.
XIII		E sai obr’e bon talan
		mi detz a far entretan
	87	que, quan venretz en las nius
		iutjar lo segl’el iorn gran,
		dous Dieus, no·m siatz esquius,
	90	e qu’ieu, clars reis regum pius,
		m’en an ab los iauzis iauzens.
XIV		E senher, no m’oblidetz gens,
	93	que ses vos no suy sostenens.
		E senh m’el vostre nom crezens:
		In nomine patris. Amens.