Betti, Maria Pia. Le Tenzoni del Trovatore Guiraut Riquier. "Studi Mediolatini e Volgare", 44 (1998), pp. 7-193.

Code: 248,011=300,001=115a,001 Auteur: Guiraut Riquier , Miquel de Castillo , Codolet Genre: Tenso (partimen) à trois Numero: III

A·n Miquel de Castilho

I		A·n Miquel de Castilho	[Guiraut]
		et a Codolen deman
		si deu saber mal o bo
		de sidons a fin ayman,
	5	si·l fa es<g>art non-chalen
		a vista de tota gen,
		si selat
		lo·y fa de bon grat,
		mas res non l'autreya
	10	de so que·l guerreya.
II		Guiraut Riquier, non es bo	[Miquel]
		que·n amor ay[a] enjan,
		car us non pot far son pro
		de sidons ab fals semblan,
	15	e dic vos que no·m es gen
		s'amor ni son lag parven,
		ni·l ris fat
		es gay biaysat.
		No·m play, ans m'esfreya,
	20	amors que guerreya.
III		Guiraut Riquier, bel e bo	Codolet
		m'es qu'ieu diga en chantan
		mon cor de bela razo
		que vos me metetz [denan].
	25	Si midons, qu'es d'avinen,
		m'esgarda am fals parven,
		lo selat
		li prenc ab bon grat,
		si tot s'esdesleya
	30	amors que·m guerreya.
IV		Jes d’amor no sabetz p<ro>,	Guiraut Riquier
		c'ans dizetz falhimen gran,
		Miquel, e no sabetz co,
		qu'ieu res d'aco no·us deman.
	35	Codolet falh yssamen,
		[pero] non tan laiamen,
		car lauzat
		m'a l'esgart privat,
		mas res no·m despleya
	40	del deman que deya.
V		Yeu vos ay dita razo,	Miquel
		Guiraut, segon mon senblan,
		e vos metetz mi tenso
		ab vostr'engenh c'avetz gran,
	45	qu'ieu parli pron, qu<i> m'enten,
		del deman c'aysi conten.
		Si l'amat
		no·l a joy donat,
		de leys cuy enveya
	50	ben laus que·s re<c>reya.
VI		Guiraut Riquier, oc e no	Codolet
		vos puesc dir al meu semblan,
		mays er ay chauzit mon pro
		de so c'anatz demandan:
	55	si·s fis aman que s'enten
		a pros dona conoysen,
		qu'esgardat
		l'aya per privat,
		de fin cor l'autreya
	60	lo joy que·l guerreya.
VII		Miquel, ab razonar gen	Guiraut Riquier
		cuiatz cobrir falhimen,
		e·l falhat
		Codolet vertat,
	65	mays lo Viguier veya
		d'ams cal pus fadeya.
VIII		Guiraut Riquier, no·m repen	Miquel
		per vostre blasmar soven,
		ni falsat
	70	non ay lo dictat,
		mas mon cor s'autreya
		al Vygier c'o veya.
IX		Per l'onrat Vigier valen	Codolet
		vuelh venir a ensenhamen,
	75	c'al falhat
		dig<u>a escac mat,
		Guiraut, e que veya
		de nos cal fadeya.