Betti, Maria Pia. Le Tenzoni del Trovatore Guiraut Riquier. "Studi Mediolatini e Volgare", 44 (1998), pp. 7-193.

Code: 248,016=100,001 Auteur: Guiraut Riquier , Bofill Genre: Tenso Numero: IV

Auzit ay dir, Bofil, que saps trobar

I		Auzit ay dir, Bofil, que saps trobar	[Guiraut]
		e fas coblas; mays saber vuelh breumen
		per can chan[ta]s: as de re espaven,
		o as dona per que o deyas far?
	5	O si cantas per plag de joglaria,
		ni per aver de lunh home que sia,
		o si chantas que ton pretz s'en enans?
		Car ton can val, s'as razon per que chans.
II		Guiraut, yeu chan per mon cors alegrar,	[Bofilh]
	10	e per amor de ley que·m ten jauzen,
		e car me platz pretz e joy e joven;
		mas ges non chan per aver acaptar,
		ni jes non quier, enans t'en donaria,
		c'a mans ne do per amor de m'amia,
	15	qu'es cuend'e pros e gay’e benestans;
		e chan per lieys, car mi fa bels semblans.
III		Bofilh, enquer te vuelh mays demandar:	[Guiraut]
		pus per amor cantas ni.t tens jauzens
		ni per domna, e di m'o sertamens
	20	de cal leys [...] es; degra m'en cessar,
		car no·s tanh jes c'om que trachors sia
		cui escontra tenga·s nostra via,
		car totz tos ditz e tos fatz son pezans
		a Jesu Crist, car lo·n avetz esglans.
IV	25	Pus plag d'amor layssatz per sermonar,	[Bofilh]
		laysa·l parlar e vist blanc vestimen,
		Guiraut, e pueis er grans l'esputamen,
		que jes midons no vol crotz adhorar,
		e si en tu fos amor ni cortezia,
	30	ja·l tuegar no·m tengras a folia,
		c'Amors vol que·s tueio·ls aymans,
		per que degus non deu esser clamans.
V		Bofilh, anc hom no poc pus ferm amar	[Guiraut]
		ni en sermo non ac mens son enten
	35	que yeu, per tal que en lays do<mn>ey plazen.
		May repenre·t deguy del tueiar,
		e tu com fol despendes ta folia,
		que vestimen, v<i>las, dir no·t tanhia,
		ni·l jutjamens pero tan per prezans
	40	sel d'Opian [...]
VI		La tenso lais, c'ueymay no·t respondria,	[Bofilh]
		car razo·t falh e dizes vilania;
		e passi m'en per mosenh'en Bertran[s],
		sel d'Opian, qu'es d'amor benenans.
VII	45	Ta resposta no vuelh ni ta paria	[Guiraut]
		d'est'or'enan, car ma valor s'en bria
		e mos sabers n'es mermatz qu'era grans,
		car ab ton pus m'en es cazutz us pans.