Levy, Emil. Guilhem Figueira, ein provenzalischer Troubadour. Berlin: Buchdruckerei von S. Liebrecht, 1880.

Code: 213,004 Auteur: Guilhem Figueira Genre: Canso Numero: II

En pessamen me fai estar amors

I	1	En pessamen me fai estar amors,
		Cum pogues far una gaia chanso
		Per la bella a cui m’autrei em do,
		Quem fetz chausir mest totas las gensors,
	5	E vol qu’ieu l’am lejalmen ses engan
		Ab verai cor et ab tota ma cura;
		Si fatz eu, si c’ades creis e melhura
		L’amors quelh port e doblon mei talan.
II		Gen m’a saubut garir de las dolors
	10	Quem fetz sofrir una longa sazo,
		Don ieu la prec, e nol quier autre do,
		Que nom fassa per quem vire alhors,
		Quar si a sen, bes pot anar pensan
		Qu’en pauc d’ora se camja l’aventura.
	15	Mal fai quil sieu mena a desmesura,
		Que jes pois tant l’autre no l’amaran.
III		Qu’ieu ai auzit, a vos o dic, senhors,
		D’un poderos emperador, que fo,
		Per cui eron malmenat siei baro,
	20	Don sos orgolhs baisset e sa vigors.
		E per so prec pro dompna benestan
		Que son amic no men outra mesura,
		Qu’en totas res fai bon gardar dreitura,
		E pent s’om tart, pois quand a pres lo dan.
IV	25	Bella domna, melher de las melhors,
		Coinda e plazens de cors e de faisso,
		Amors me ten en sa doussa preiso.
		Per vos o dic, que pros m’er et honors,
		Si ja fos mais que dieus m’espires tan
	30	Quem volcsetz far de vostres bratz centura;
		En tan col mons ressenh e clau e dura
		Non es mais res qu’ieu desir aver tan.
V		E puois tant val, dompna, vostra valors
		Qu’al mon non vei tant bella ni tant pro,
	35	Ja no vulhatz qu’eus serva en perdo;
		Cum majer es d’ome sa grans ricors,
		Mielhs deu gardar a cels que servit l’an.
		Qu’aisso, sapchatz, mou de gentil natura,
		Com renda mal segon la forfaitura.
	40	E ben per ben, dompna; als nous deman.
VI		Las! mil n’ai faitz entre sospirs e plors,
		Tal paor ai que ja noi aja pro,
		Quan pens cum etz de gentil nassio,
		E cum vos etz de totas rais e flors,
	45	E cum vos sai coinda, bella e prezan,
		E cum vos etz fina, lejals e pura,
		E cum chascus autreja e pliu e jura
		Que non avetz el mon par ni semblan.
VII		Dompna, merce valham vostra valors,
	50	Ja non gardetz a vostre pretz tan gran,
		Mas cum vos ai voluntat fina e pura,
		E cum mos cors s’aficha e s’atura
		En vos amar, que d’als non ai talan.