Levy, Emil. Guilhem Figueira, ein provenzalischer Troubadour. Berlin: Buchdruckerei von S. Liebrecht, 1880.

Code: 194,015 Auteur: Guilhem Figueira Genre: Pastorela Numero: III

L'autrier cavalgava

I	1	L’autrier cavalgava
		Sus mon palafre
		Ab clar temps sere
		E vi denant me
	5	Una pastorella
		Ab color fresqua e novella,
		Que cantet mout gen
		E dizia en planhen:
		Lassa! mal viu, qui pert son jauzimen.
II	10	Lai ont ilh cantava,
		Viriei tost mon fre,
		Et ilh levet se
		La sua merce
		Vas mi mout isnella,
	15	La francha res bona e bella,
		Et ien mantenen
		Desmontiei per honramen
		De lieis quem fetz tan belh aculhimen.
III		Toza de bon aire,
	20	Dis ieu ses temer,
		Prec quem diatz ver,
		Sius ven a plazer,
		Quinha cansos era
		Selha que diziatz era,
	25	Quan ieu vinc aissi,
		Quar anc mais, so vos afi,
		Tan ben cantar pastora non auzi.
IV		Senher, non a guaire
		Qu’ieu soli’ aver
	30	A tot mon voler
		Tal quem fai doler,
		Car non l’ai enquera,
		Mas elh m’oblida e s’esfera
		Per autra de mi,
	35	Per qu’ieu planc et atressi
		Chan qu’oblides la dolor que m’auci.
V		Toza, ses falhensa
		Vos dic atrasag
		Que atretal plag,
	40	Quon a vos a fag
		Aquelh queus oblida,
		M’a fag una descauzida,
		Qu’ieu amava fort;
		Era m’oblid’ al sieu tort
	45	Per un autre, que volria aver mort.
VI		Senher, mantenensa
		Trobatz del forfag
		Queus a fag tan lag
		La fals’ ab cor frag,
	50	E veus m’en aizida
		Queus am a tota ma vida,
		Sim n’es en acort,
		E tornem lo desconort
		Qu’avem avut en joi et en deport.
VII	55	Francha res grazida,
		Ma voluntat n’ai complida,
		Sim n’es en acort,
		De vos quem faitz a bon port
		Venir joios de tot perilh estort.
VIII	60	Senher, ses falhida
		Estorta m’a e guerida
		Vostr’ amors tan fort
		Que de nulh mal nom recort,
		Tan gen m’avetz tot mon mal talan mort.