Gouiran, Gérard. L'amour et la guerre. L'œuvre de Bertran de Born. Aix-en-Provence: Université de Provence, 1985.

Édition revue et corrigée pour Corpus des Troubadours, 2012.

Code: 080,019 Auteur: Bertran de Born Genre: Canso Numero: II

Ges de disnar no·n fora oi mais maitis

I	1	Ges de disnar no·n fora oi mais maitis,
		Qui agues pres bon ostau
		E fos dedinz la carns e·l pans e·l vis,
		E·l focs fos clars cum de fau.
	5	Lo plus rics jorns es huoi de la setmana
		E degra m’estar soau,
		C’aitan volgra volgues mon pro Na Lana
		Cum lo seigner de Peitau.
II		Per saludar torn entre·ls Lemozis
	10	Cellas qui ant pretz cabau.
		Mos Bels-Seigner e mos Bels-Cembelis
		Qieiron oi mais qui las lau ;
		Q’ieu ai trobat del mon la plus certana
		E la genssor c’om mentau ;
	15	Per que s’amors m’es tant cotidiana
		Q’a las autras mi fai brau.
III		Gens, joves cors, francs e verais e fis,
		D’aut paratge e de reiau,
		Per vos serai estrains de mon païs
	20	E·m mudarai part Angau.
		E, car etz tant sobr’autras sobeirana,
		Vostra valors n’es plus au :
		Q’onrada n’er la corona romana
		Si·l vostre caps s’i enclau.
IV	25	Ab doutz esgar qe·m fetz et ab clar vis
		Mi fetz Amors son esclau,
		E mos seigner m’ac pres de lieis assis
		Sobr’un feltre emperiau,
		E la paraula fon doussa et humana
	30	E·il dich cortes e soau,
		E de solatz mi semblet Catalana
		E d’acuillir de Fanjau.
V		Al gen parlar qe·m fetz et al bel ris,
		Quan vi las denz de cristau
	35	E·l cors graile, delgat e fresc e lis,
		Trop ben estan en bliau,
		E la colors fo fresca e rosana,
		Retinc mon cor dinz sa clau.
		Mais aic de joi que qi·m des Corrozana,
	40	Car a son grat m’en esgau.
E		De totas es Na Maier sobeirana
		De qant mars e terra clau.