Gouiran, Gérard. L'amour et la guerre. L'œuvre de Bertran de Born. Aix-en-Provence: Université de Provence, 1985.

Édition revue et corrigée pour Corpus des Troubadours, 2012.

Code: 080,009 Auteur: Bertran de Born Genre: Canso Numero: III

Casutz sui de mal en pena

I	1	Casutz sui de mal en pena
		E vau lai o·l cors mi mena,
		Don ja mais
		No·m descargarai del fais ;
	5	Car mes m’a en tal cadena
		Don mailla no·is descontena,
		Car m’atrais
		Ab un esgart en biais
		Una gaia, fresca Elena.
	10	Faicha ai longa carantena,
		Mas oi mais
		Sui al digous de la Cena.
II		Tant es d’amorosa mena
		Q’ieu morrai, si no m’estrena
	15	D’un doutz bais.
		Mas en trop d’orguoill m’eslais !
		De tota beutat terrena
		Ant pretz las tres de Torena,
		Fi·n essais,
	20	Mas ill val sobr’ellas mais
		Tant qant val aurs plus q’arena ;
		Q’ieu non vuoill aver Ravena
		Ni Roais,
		Ses lieis qe ja no·m retena.
III	25	Ren de beutat non galia
		Ni·n fai nuilla fantaumia
		Lo joios,
		Joves, gens cors amoros
		E genssa, qui la deslia ;
	30	Et on hom plus n’ostaria
		Garnizos,
		Plus en seria enveios,
		Que la nuoig fai parer dia
		La gola, e qui·n vezia
	35	Plus en jos,
		Totz lo mons en gensaria.
IV		Doncs be·is taing c’Amors m’aucia
		Per la genssor q’el mon sia,
		En perdos,
	40	Que, qand remir sas faissos,
		Conosc que ja non er mia,
		Car chausir pot, si·s volia,
		Delz plus pros
		Castellas o rics baros ;
	45	Q’en lieis es la seignoria
		De pretz e de cortesia,
		De gens dos
		E de far que ben l’estia.
V		Ja mais non er cortz complia
	50	On hom non gab ni non ria :
		Cortz ses dos
		Non es mas parcs de baros.
		Et agra·m mort ses faillia
		L’enois e la vilania
	55	D’Argentos,
		Ma·l gentils cors amoros
		E la doussa cara pia
		E la bona compaignia
		E·l respos
	60	De la Saisa·m defendia.