Gouiran, Gérard. L'amour et la guerre. L'œuvre de Bertran de Born. Aix-en-Provence: Université de Provence, 1985.

Édition revue et corrigée pour Corpus des Troubadours, 2012.

Code: 080,038 Auteur: Bertran de Born Genre: Canso Numero: VIII

S'abrils e foillas e flors

I	1	S’abrils e foillas e flors
		E·il beill maitin e·il clar ser
		D’un ric joi cui eu esper
		No m’alegron et amors
	5	E·il rossignolet q’auch braire
		E·l nous temps vertz e grazitz
		Qe·ns adutz jois e doussors
		E·l coindes pascors floritz
		Midonz son ardit non creis
	10	E no·il merma l’espavens,
		Tart m’en venra gauzimens.
II		Dompna, s’ieu quisi socors
		Aillor, non o fis en ver ;
		E ve·us m’al vostre plazer
	15	Mi e mos chans e mas tors ;
		E pren comjat del repaire
		On tant gen fui acuillitz,
		On nais jois, sens e valors.
		E cel que manten faiditz,
	20	Per honor de si mezeis,
		Qan fan bos acordamens,
		Asols los affiamens.
III		Vostre reptars m’es sabors,
		Ric, car cuidatz tant valer
	25	Que ses donar, per temer,
		Volriatz aver lauzors
		E c’om no·us auses retraire
		Qand us fai que descausitz.
		Mas semblaria paors,
	30	Si n’era per mi cobritz
		Coms ni vescoms, ducs ni reis.
		Mas faitz vostres faitz tant gens
		Que·us en segua digz valens !
IV		Uns n’i a gerreiadors,
	35	Que ant de mal far lezer
		E no·is sabon captener
		Nuill temps ses engignadors,
		Tant amont lanssar e traire ;
		E vei los totz temps garnitz
	40	Coma Vivian de Tors.
		Per q’ieu no lur sui aizitz,
		Q’anc a bon pretz non ateis
		Rics hom, si jois e jovens
		E valors no·ill fon guirens.
V	45	D’autres n’i a bastidors,
		Rics homes de gran poder
		Que sabon terra tener
		E fant portals e bestors
		De calz e d’arena ab caire,
	50	E fant tors, voutas e vitz ;
		E vei los bons manjadors,
		Don fant lor dons plus petitz ;
		E jes bons pretz no lor creis,
		Car aitals captenemens
	55	Non val mest las bonas gens.
VI		D’autres n’i a cassadors
		Per la costuma tener,
		Qe·is fant ric home parer,
		Car amon cans et austors
	60	E corn e taborn e laire,
		Q’es lor pretz tant frevolitz
		Et an tant pauc de valors
		E lor poders tant frezitz
		Que res mas bestia o peis
	65	Non lur es obediens
		Ni fai lor comandamens.
VII		Ges dels ricx torneyadors,
		Si tot se guaston l’aver,
		No·m pot us al cor plazer,
	70	Tan los truep gualiadors.
		Ricx hom que per aver traire
		Sec torneyamens plevitz
		Per penre sos vasvassors,
		Non l’es honors ni arditz.
	75	Mas elh non estrenh correys,
		Sol c’ab elh s’en an l’argens
		S’om pueys s’en es maldizens.
VIII		Ric home, vuelh qu’ab amors
		Sapchon cavalliers aver
	80	E que·ls sapchon retener
		Ab befag et ab honors
		E c’om los truep ses tort faire
		Francx e cortes e chauzitz
		E larcx e bos donadors,
	85	Qu’aissi fon pretz establitz
		Qu’om guerreyes ab torneys,
		E Quaresmas et Avens
		Fesson soudadiers manens.
E		Na Tempra, joys m’es cobitz,
	90	Qu’ieu n’ai mays que s’era reys,
		Que·l fels mesclatz ab eyssens
		M’es endevengutz pimens.
E'		Papiol, s’est tan arditz,
		Pren mon chan e vai n’ab eis
	95	A N’Oc-e-No, quar prezens
		Li fatz de maynhs digz cozens.