Gouiran, Gérard. L'amour et la guerre. L'œuvre de Bertran de Born. Aix-en-Provence: Université de Provence, 1985.

Édition revue et corrigée pour Corpus des Troubadours, 2012.

Code: 080,023 Auteur: Bertran de Born Genre: Sirventes Numero: IX

Lo coms m'a mandat e mogut.

I	1	Lo coms m’a mandat e mogut
		Per N’Araimon Luc d’Esparo
		Q’ieu fassa per lui tal chansso
		On sion trencat mil escut,
	5	Elm et ausberc et alcoto,
		E perpoing falsat e romput.
II		Et er l’ops que sia atendut,
		Pois comtar mi fai sa razo,
		E que ges non diga de no,
	10	Depois que m’o a covengut ;
		Que blastimarant m’en Gasco,
		Car de lor mi tenc per tengut.
III		A Tolosa, part Montagut,
		Fermara·l coms son gomfano
	15	El prat comtal, costa·l Peiro ;
		E qand aura son trap tendut,
		E nos lotjarem de viro
		Tant que tres nuoitz i jairem nut.
IV		E seran i ab nos vengut
	20	Las poestatz e li baro
		E li plus honrat compaigno
		Del mon e li plus mentaugut ;
		Que per aver, que per somo,
		Que per pretz s’i serant mogut.
V	25	E desse que serem vengut,
		Mesclar s’a·l torneis pel cambo
		E·ll Catalan e·ll d’Arago
		Tombaran soven e menut,
		Que no·ls sostenran lor arso,
	30	Tant grans colps los ferrem nos drut.
VI		E non pot esser remasut
		Contra·l cel non volon tronco
		E que cendat e cisclato
		E samit non sion romput,
	35	Cordas e tendas e paisso
		E trap e pavaillon tendut,
VII		Lo reis q’a Tarascon perdut
		E·l seigner de Mon-Albeo,
		Rotgiers e·l fills Bernart Otho
	40	E lo coms Peire lor n’aiut
		E·l coms de Fois ab Bernardo
		E·N Sans, fraire del rei vencut.
E		De lai, pensson de garnizo,
		Que de sai lor er atendut.
E'	45	Totz temps vuoill que li aut baro
		Sion entre lor irascut.