Gouiran, Gérard. L'amour et la guerre. L'œuvre de Bertran de Born. Aix-en-Provence: Université de Provence, 1985.

Édition revue et corrigée pour Corpus des Troubadours, 2012.

Code: 080,026 Auteur: Bertran de Born Genre: Planh Numero: XIII

Mon chan fenis ab dol et ab maltraire

I	1	Mon chan fenis ab dol et ab maltraire
		Per totz temps mais e·l tenc per romazut,
		Car ma rason e mon gaug ai perdut
		El meillor rei que anc nasques de maire,
	5	Larc e gen parlan
		E ben cavalgan,
		De bella faiso
		E d’umil senblan
		Per far grans honors.
	10	Tant cre que·m destreingna
		Lo dols que m’esteingna,
		Car en vauc parlan.
		A Dieu lo coman,
		Que·l met’en loc san Joan.
II	15	Reis dels cortes e dels pros emperaire
		Foratz, seingner, si acses mais vescut,
		Que “Reis Joves” avias nom agut
		E de joven eras capdels e paire.
		Et auberc e bran
	20	E bel bocaran,
		Elm e gonfano
		E perponh e pan
		E jois et amors
		Non an qui·ls manteingna
	25	Ni qui ja·ls reteingna ;
		Mas lai vos sigran,
		C’ab vos s’en iran
		E tut ric faig benestan.
III		Gent acuillir e donar ses cor vaire
	30	E bel respos e “ben siais vengut”
		E gran hostal pagat e gen tengut,
		Dons e garnirs et estar ses tort faire,
		Manjar ab mazan
		De viol’e de chan
	35	E maint compaingno
		Ardit e poissan
		De totz los meillors :
		Tot voill c’ap vos teingna,
		Qe hom re non teingna
	40	Al segle truan
		Pel malastruc an
		Que nos mostret bel senblan.
IV		Seingner, en vos non era res a faire,
		Que totz lo mons vos avi’elegut
	45	Pel meillor rei que anc portes escut
		E·l plus ardit e·l meillor torneiaire ;
		Deus lo temps Rolan,
		De lai ni denan,
		Non vi hom tan pro
	50	Ni tan guerrian
		Ni don sa lausors
		Tant pel mon s’enpeingna
		Ne si lo reveingna,
		Neis qui l’an sercan
	55	Per tot a garan,
		Del Nil tro·l soleill colgan.
V		Seingner, per vos mi voill de joi estraire,
		E tut aqil que·us avion vezut
		Devon estar per vos irat e mut
	60	E ja mais jois la ira no m’esclaire !
		Engles e Norman,
		Breton et Irlan,
		Guian e Gasco
		Et Anjaus pren dan
	65	E·l Maines e Tors ;
		Fransa tro Conpeingna
		De plorar no·s teingna
		E Flandres de Gan
		Tro·l port de Guizan ;
	70	Ploron neis li Aleman !
E		Loirenc e Braiman,
		Qan torneiaran,
		Auran dol quan no·us veiran.
E'		No pretz un besan
	75	Ni·l cop d’un’aglan
		Lo mon ni cels que·i estan,
E''		Per la mort pesan
		Del bon rei presan
		On tuit devem aver dan.