Gouiran, Gérard. L'amour et la guerre. L'œuvre de Bertran de Born. Aix-en-Provence: Université de Provence, 1985.

Édition revue et corrigée pour Corpus des Troubadours, 2012.

Code: 080,011 Auteur: Bertran de Born Genre: Sirventes Numero: XV

Corz e gestas e joi d'amor

I	1	Corz e gestas e joi d’amor
		Me solion far esbaudir
		E tener gai e chantador,
		Tro per lei cui dei obedir
	5	Mi fo mos chantars devedatz
		Et en la lei
		Era mos chans excomonjatz.
II		Ara sui asoutz en amor
		E veiretz anar e venir
	10	Chansos, pos a la bellasor
		Platz qe mon chant dei’acuillir
		En m’onranza, s’es acordaz
		Son cors a drei ;
		E no·i ac negun dels comtatz.
III	15	Del pauc rei de Terra Maior
		Me platz, c’aisi·s vol enantir,
		C’oi mais lo tenran per seignor
		Seill que·ill devon son feu servir.
		Puois vencut los a vas Aratz,
	20	Ar es estei
		E cobre ses dretz daus totz latz !
IV		No·m tengatz per acusador
		Si·us voill c’uns rics l’autre azir,
		Car meill s’en poiran valvasor
	25	Et castellan de lor jausir,
		Que plus es francs, larcs e privatz,
		Fe qu’eu vos dei,
		Rics hom ab guerra que ab patz.
V		Ben sai que li malparlador,
	30	Quar voill de lor gillas ver dir,
		M’en appellaren soffridor,
		Car mi lais forsar ni baillir ;
		Qe·ls dons que mes frair m’a juratz
		E fag autrei
	35	Vol retener l’autra meitatz.
VI		Puois non volen dreit ni amor
		Faire ni negun plait suffrir,
		Ges per lezeros d’obrador,
		S’eu m’en podia revestir,
	40	Non dei esser malrasonatz ;
		Que·ill fan plaidei
		Mantas vez c’om no·ls n’a preiatz.
VII		Mas eu ai tant ensegnador,
		Non sai, per Crist, lo meill chausir :
	45	Cant eu pren e tol la ricor
		D’aquels que no·m laissan garir,
		Dison que trop me sui cochatz ;
		Car non guerrei,
		Ara dison qe sui malvatz.
E	50	Papiol, e tu vai viatz,
		Al Joune Rei
		Diras que trop dormir no·m platz.
E'		En Oc-e-No ama mais patz,
		Ab fe lo crei,
	55	Que·l frair Joans deseretatz.