Gouiran, Gérard. L'amour et la guerre. L'œuvre de Bertran de Born. Aix-en-Provence: Université de Provence, 1985.

Édition revue et corrigée pour Corpus des Troubadours, 2012.

Code: 080,039 Auteur: Bertran de Born Genre: Sirventes Numero: XIX

Seigner En coms, a blasmar

I	1	Seigner En coms, a blasmar
		Vos fai senes faillia,
		Car no·i ausetz anar,
		Pois ella o volia,
	5	A la domna parlar
		Et al for de Cataloigna
		Al vostr’ops eu n’ai vergoigna
		Car la·i fesetz fadiar.
II		E fis drutz no·is deu tardar,
	10	Si messatge·l venia,
		Mas que pens del anar
		E que·is meta en la via,
		Com non sap son affar
		De sidonz ni sa besoigna :
	15	Ben leu a talan que joigna,
		Per que no·is deu aturar.
III		E qan vitz vostre joglar
		Que devas lieis venia,
		Ja no·us degratz restar,
	20	Qi·us dones Normandia ;
		S’acsetz bon cor d’anar,
		Antre Leira e Dordoigna
		De regart no·us daratz soigna
		Ni ja no·us degra membrar.
IV	25	Mas ara podetz proar
		S’es vers so qu’eu dizia
		Que non fai ad amar
		Rics hom per drudaria.
		Tant ant a cossirar,
	30	Per qe·l jois d’amor los loigna.
		Q’ieu non vuoil aver Bergoigna
		Sens temer e sens celar.
V		Q’ieu non vuoill ges esser bar
		Ni de gran manentia
	35	Per qe·m pogues reptar
		Nuills hom de vilania.
		Mais am rire e gabar
		Ab midonz que m’en somoigna
		Qu’eu no volria Gascoigna
	40	Ni Bretaigna capdellar.
VI		Mon chant vir vas N’Azemar,
		Qui s’onor en sabria,
		Cui nostre seigner car.
		Sa pauca Lombardia
	45	Tant gen sap dompneiar
		Que no·is camja ni s’embroigna
		Per menassas, anz ressoigna
		Limotg’e·l fai reserar.
E		Si·l coms Jaufres no s’esloigna,
	50	Peitau aura e Gascoigna,
		Si tot no·is sap dompneiar.