Gouiran, Gérard. L'amour et la guerre. L'œuvre de Bertran de Born. Aix-en-Provence: Université de Provence, 1985.

Édition revue et corrigée pour Corpus des Troubadours, 2012.

Code: 080,036 Auteur: Bertran de Born Genre: Sirventes Numero: XX

Rassa, mes si son primier

I		Rassa, mes si son primier
		En la fin que ant parlada
		Li seignor e·il mainadier
		E·il baron de l’encontrada.
	5	E s’il fant vas vos estrada,
		Et eu cal mal vos en mier,
		Que terra non ai cobrada ?
II		Chascus mi laissa derrier
		Qan m’ant mes en la mesclada
	10	Li gentil e li lainier.
		Pois q’ant ma terra adermada
		Et arsa et abrasada,
		Dizont cill de Colombier
		Q’en prenda dreich, si m’agrada.
III	15	Nos em .xxx. tal gerrier :
		Chascus ha capa traucada,
		Tuich seignor e parsonier,
		Per cor de gerra mesclada,
		C’anc no·n cobrem dinairada ;
	20	Anz qand a als colps mestier,
		Ant lor coreilla prestada.
IV		Oi mais seran ric portier,
		Que tenrant porta serrada ;
		E sabran arbalestier
	25	Q’es la patz en l’encontrada,
		C’om non lor dara soudada.
		Doncs auran chan e lebrier
		Del comte s’amor privada.
V		Austor e falcon gruier,
	30	Corn e tabors encuirada,
		Li braquet e·il liamier,
		Arc ab sajeta barbada,
		Gannacha larga, folrada,
		Et osas de Salavier
	35	Serant mais de lor mainada.
VI		Sercat ai da Monpeslier
		Tro lai part la mar salada,
		Que non trob baron entier
		C’aia proeza acabada,
	40	Q’el mieichluec non sia oscada
		O fraicha da l’un cartier,
		Ni mais us no m’en agrada.
E		Bella dompna, a Dieu vos qier,
		Que tant vos ai desirada
	45	Que mort m’ant li desirier,
		Avinens dompna prezada.
E'		Na Tenpre, ·l gensser m’agrada,
		Que m’a per son messatgier
		Del mon la razon celada.