Gouiran, Gérard. L'amour et la guerre. L'œuvre de Bertran de Born. Aix-en-Provence: Université de Provence, 1985.

Édition revue et corrigée pour Corpus des Troubadours, 2012.

Code: 080,035 Auteur: Bertran de Born Genre: Sirventes Numero: XXIV

Cant vei pels vergiers desplegar

I	1	Cant vei pels vergiers desplegar
		Los cendatz grocs, indis e blaus,
		M’adousa la vos dels cavaus
		E·l sonet que fan li juglar
	5	Que viulen de trap en tenda,
		Trombes e corn e graile clar.
		Adoncs voill un sirventes far
		Tal que·l coms Richartz l’entenda.
II		Ab lo rei mi voill acordar
	10	D’Aragon e tornar en paus.
		Mas trop fon descauzitz e braus
		Qant venc sai sus per osteiar ;
		Per qu’es dregs qu’eu lo·l reprenda.
		Ieu o dic per lui castiar ;
	15	E peza·m si·l vei folleiar
		E voill que de mi aprenda.
III		Ab mi·l volon tut encuzar,
		C’us me comdet de sos vassaus
		Que de Castellot ac mal laus,
	20	Quant ne fes N’Espangnol gitar.
		E no·m par que si defenda
		Ves el, si el n’auza proar ;
		E quant intret per covidar,
		Conquerri lai pauc de renda.
IV	25	Oi mais no li puosc ren celar,
		Anz li serai amics coraus :
		Gastons cui es Bearns e Paus
		Mi trames sai novas comdar
		Que de sos pres pres esmenda
	30	Del rei, que·ls i degra liurar,
		E volc en mais l’aver portar
		Que hom totz sos pres li renda.
V		Que so m’an dig de lui joglar
		Q’en perdon an fags totz lur laus.
	35	S’anc lur det vestirs vertz ni blaus
		Ni lur fes nuill denier donar,
		Lag l’es c’om l’en sobreprenda
		Que d’un sol s’en saup ben pagar,
		D’Artuzet, don fai a blasmar,
	40	Qu’en mes als Juzieus en venda.
VI		Peire Joglar saup mal pagar,
		Que·l prestet deniers e cavaus,
		Que la vella que Fons-Ebraus
		Atent lo fes tot pesseiar ;
	45	Qu’anc l’entreseings fags ab benda
		De la jupa del rei d’armar
		Que·l baillet, no li puoc guizar
		C’om ab coutels tot no·l fenda.
VII		Peire Roïs saup divinar,
	50	Al prim que·l vi joves reiaus,
		Que no seria arditz ni maus ;
		E conoc lo al badaillar :
		Reis que badaill ni s’estenda
		Qant aug de batailla parlar
	55	Sembla o fassa per vaneiar
		Ni en armas no entenda.
VIII		Eu lo·il perdo si·m fe mal far
		A Catalans ni a Laraus ;
		Puois lo seingner cui es Pitaus
	60	Lo·i mandet, non auset als far.
		E reis que loger atenda
		De seignor, be·l deu affanar ;
		Et el venc sai per gazaignar
		Mais qe per autra fazenda.
E	65	Voill sapcha·l reis e aprenda
		De son grat e fassa cantar
		Mon sirventes al rei Navar
		E per Castella l’estenda.