Gouiran, Gérard. L'amour et la guerre. L'œuvre de Bertran de Born. Aix-en-Provence: Université de Provence, 1985.

Édition revue et corrigée pour Corpus des Troubadours, 2012.

Code: 080,002 Auteur: Bertran de Born Genre: Sirventes Numero: XXVI

Al nou doutz termini blanc

I	1	Al nou doutz termini blanc,
		Del pascor vei la elesta
		Don lo nous temps s’escontenta ;
		Qand la sazos es plus genta
	5	E plus avinens e val mais,
		Et hom deuria esser plus gais,
		E meillor sabor me a jais.
II		Per qe·m pesa, car m’estanc,
		Q’ieu ades non pas la festa,
	10	C’us sols jorns mi sembla trenta
		Per una promessa genta
		Don mi sortz trebaills et esglais ;
		E non vuoill sia mieus Doais
		Ses la sospeisson de Cambrais.
III	15	Pustella en son huoill e cranc
		Qui ja mais l’en amonesta !
		Que ja malvastatz dolenta
		No·il valra mession genta,
		Ni sojorns ni estar ad ais
	20	Tant cum gerra, trebails e fais ;
		So sapcha·l seigner de Roais !
IV		Ni anc no·n vim bratz ni flanc
		Tronchat, ni gamba ni testa
		Ferit de plaia dolenta ;
	25	Ni ab grand ost ni ab genta,
		No·l vim a Roam ni a Sais.
		E membres li c’om li retrais
		Q’anc en escut lansa non frais !
V		Gerra ses fuoc e ses sanc
	30	De rei ni de gran poesta
		Cui nom laidis ni desmenta,
		Non es ges paraula genta !
		Qu’el pois si sojorn ni s’engrais !
		E joves cui gerra non pais
	35	N’esdeven leu flacs e savais.
VI		Reis de Franssa, e·us tenc per franc :
		Car hom a Tors no·us fai qesta
		Ni de Giortz no·us presenta
		Patz ni fin que sia genta,
	40	Ec vos la guerra e la pais !
		E domentre c’om s’i eslais,
		Non er sos pretz fins ni verais.
VII		Ges d’En Oc-e-Non no·m planc,
		Qu’eu sai ben q’en lui non resta
	45	La gerra ni non s’alenta,
		C’anc patz ni fis no·il fon genta,
		Ni hom plus volontiers non trais
		Ni non fetz cochas ni assais
		Ab pauc de gens ni ab gran fais.
E	50	Lo reis Felips ama la pais
		Plus que·l bons hom de Tarantais
E'		E·N Oc-e-Non vol gerra mais
		Plus que non fetz uns dels Algais.