Gouiran, Gérard. L'amour et la guerre. L'œuvre de Bertran de Born. Aix-en-Provence: Université de Provence, 1985.

Édition revue et corrigée pour Corpus des Troubadours, 2012.

Code: 080,029 Auteur: Bertran de Born Genre: Sirventes Numero: XXVIII

Non puosc mudar mon chantar non esparga

I	1	Non puosc mudar mon chantar non esparga,
		Pois N’Oc-e-Non a mes fuoc e traich sanc,
		Car grans gerra fai d’escars seignor larc,
		Per qe·m plai ben dels reis auzir la bomba,
	5	Que n’aion ops paisson, cordas e pom,
		E·n sion trap tendut per fors jazer,
		E·nz encontrem a milliers et a cens,
		Si c’apres nos en chant hom puois de gesta.
II		Q’ieu n’agra colps receubutz en ma targa
	10	E faich vermeil de mon gonfanon blanc ;
		Mas per aisso m’en soffrisc e m’en parc
		Qu’En Oc-e-Non vei que un dat mi plomba ;
		Mas non ai ges Lezinan ni Rancom
		Q’ieu puosca loing osteiar ses aver,
	15	Mas aiudar puosc de mos conoissens,
		L’escut al col e·l capel en ma testa.
III		Si·l reis Felips n’agues ars’una barga
		Denan Guiortz, o crebat un estanc,
		O a Roam intres per forssa el parc,
	20	Que l’asetges pel puoig e per la comba
		C’om no·n pogues traire breu ses colom,
		Adoncs sai eu q’el volgra far parer
		Carle, que fon del mieills de sos parens,
		Per cui fon Poilla e Sansoigna conquesta.
IV	25	Anta l’adutz e de pretz lo descarga
		Gerra cellui cui hom no·n troba franc,
		Per qu’eu non cuich lais Caortz ni Cajarc
		Mos Oc-e-Non, pois tant sap de trastomba.
		Si·l reis li da lo thesaur de Chinom,
	30	De gerra a cor et aura·n pois poder ;
		Tant l’es trebaills e messios plazens
		Que los amics e·ls enemics tempesta.
V		Anc naus de mar, qand a perdut sa barga
		Et a mal temps e·is vol urtar al ranc
	35	E cor plus fort d’una sajeta d’arc
		E·is leva en aut e puois aval jos tomba,
		No·n trais anc pieitz, e dirai vos ben com,
		Q’ieu fatz per lieis que no·m vol retener,
		Que no·m manten jorn, terme ni covens,
	40	Per que mos jois qu’era floritz bisesta.
E		Vai, sirventes, ades tost e correns,
		A Traïnac sias anz de la festa ;
E'		Di·m a·N Rotgier et a totz mos parens
		Que no·i trob plus omba ni om ni esta.