Gouiran, Gérard. L'amour et la guerre. L'œuvre de Bertran de Born. Aix-en-Provence: Université de Provence, 1985.

Édition revue et corrigée pour Corpus des Troubadours, 2012.

Code: 080,031 Auteur: Bertran de Born Genre: Sirventes Numero: XXIX

Pois als baros enoia e lor pesa

I	1	Pois als baros enoia e lor pesa
		D’aqesta patz q’ant faita li doi rei,
		Farai chansson tal que qand er apresa
		A cada un sera tart que gerrei,
	5	E no m’es bel de rei q’en patz estei
		Deseretatz ni que perda son drei
		Tro la demanda q’a faita a conquesa.
II		Ab ambedos ten hom ad avolesa
		Car ant fait plait don qecs de lor sordei.
	10	Cinc dugatz a la corona francesa
		E, si·ls comtatz, son a dire li trei,
		E de Giortz pert lo ces e l’esplei
		E Caersins reman sai en trepei
		E Bretaigna e la terra engolmesa.
III	15	Jes aitals patz no meillura proesa
		Cum aqesta ni autra, com lo grei ;
		Ni deu soffrir c’om li bais sa riquesa,
		Puois Esaudun a tornat deves sei
		Lo reis Henrics e mes en son destrei ;
	20	E non cuig jes q’a son home s’autrei
		Si·l fieu d’Angieus li merma una crestesa.
IV		Si·l reis engles fetz mais don ni larguesa
		Al rei Felip, dreitz es q’el l’en mercei,
		Q’el fetz liurar la moneda anglesa
	25	Q’en Franssa·n son carzit sac e correi ;
		E non foron Angevin ni Mansei,
		Que d’esterlins foro·il primier correi ;
		Que desconfiron la gen campanesa.
V		Lo sors Guerics dis paraula cortesa
	30	Qan son nebot vi tornat en esfrei :
		Totz desarmatz volgra·n fos la fins presa,
		Qan fo armatz non volc penre plaidei ;
		E non semblet jes lo seignor d’Orlei
		Que desarmatz fo de peior mercei
	35	Que qand el cap ac la ventailla mesa.
VI		A rei armat lo ten hom a flaquesa
		Qand es en camp e vai penre plaidei.
		Ben ant camjat honor per cobeitesa,
		Segon q’auch dir, Bergoignon e Francei ;
	40	E valgra mais, per la fe q’ieu vos dei,
		Al rei Felip comenses lo desrei
		Que plaideiar armatz sobre la glesa.
E		Vai, Papiol, mon sirventes a drei
		Me portaras part Crespin-el-Valei
	45	Mon Isembart en la terra artesa.
E'		E digas li q’a tal dompna soplei
		Que marves pot jurar sobre la lei
		Que·il meiller es del mon e·il plus cortesa.