Gouiran, Gérard. L'amour et la guerre. L'œuvre de Bertran de Born. Aix-en-Provence: Université de Provence, 1985.

Édition revue et corrigée pour Corpus des Troubadours, 2012.

Code: 080,004 Auteur: Bertran de Born Genre: Chanson de croisade Numero: XXXIV

Ara sai eu de prez qals l'a plus gran

I	1	Ara sai eu de prez qals l’a plus gran
		De totz aqels qe·s leveron maiti :
		Seigner Conratz l’a plus fi, ses enjan,
		Qe·s defen lai a Sur d’En Saladi
	5	E de sa masnada croia.
		Secora·l Deus, qe·l socors vai tardan !
		Sols aura·l prez, qar sols soffre l’affan.
II		Seigner Conrat, a Jesu vos coman,
		Q’eu fora lai a Sur, so vos afi,
	10	Mas laissei m’en qar s’anavan tardan
		Li comt’e·ill duc, li rei e li princi.
		Pois vi midonz bell'e bloia,
		Per qe s’anet mos cors afebleian,
		Qu’eu fora lai, ben ha passat un an.
III	15	Seigner Conrat, eu sai dos reis q’estan
		D’aiudar vos. Ara entendatz qui :
		Lo reis Felips es l’us, qar vai doptan
		Lo rei Richart ; et el lui dopt’aissi.
		Ar fos usqecs d’els em boia
	20	D’En Saladi, pos van Deu galian,
		Qar son crosat e d’anar mot non fan.
IV		Seigner Conrat, tot per vostr’amor chan,
		Ni ges no·i gart amic ni enemi ;
		Mas per so·l fatz qe·ls crosatz vauc reptan
	25	Del passage q’an si mes en obli.
		Non cuidon q’a Deu enoia
		Q’ill se paisson e se van sojornan ?
		E·us enduratz fam e set, e·ill estan !
V		Seigner Conrat, la roda·s vai viran
	30	En aqest mon pur en mal a la fi,
		Qar paucs en sai qe no s’anon penan
		Qom enganon vezi e no-vezi.
		Mas cel qui perd no·ill par joia !
		Doncs sapchan be cill q’eu dic q’aiso fan
	35	Qe Deus escriu so qe dich e faich an.
VI		Seigner Conrat, lo reis Richartz val tan
		(Si tot, qan voill, de lui gran mal m’en di)
		Q’el passera ab tal esfortz ogan
		Qon far poira, so aug dir tot de fi ;
	40	E·l reis Felips en mar poia
		Ab autres reis, q’ab tal esfortz venran
		Qe part l’Arbre-Sec irem conquistan.
E		Bels Papiols, vas Savoia,
		Ten ton camin, e vas Branditz brocan,
	45	E passa·l mar, q’al rei Conrat ti man.
E'		Can seras lai, no te noia,
		Tu li diras qe, s’ar no·ill vaill ab bran,
		E·il valrai tost, si·ll rei no·m van bauzan.
E''		Mas ben es ver q’a tal dompna·m coman,
	50	Si·ll passatges no·ill platz, non crei qe i an.