Gouiran, Gérard. L'amour et la guerre. L'œuvre de Bertran de Born. Aix-en-Provence: Université de Provence, 1985.

Édition revue et corrigée pour Corpus des Troubadours, 2012.

Code: 080,008 Auteur: Bertran de Born Genre: Sirventes Numero: XXXV

Be·m platz car trega ni fis

I	1	Be·m platz car trega ni fis
		Non reman entre·ls baros,
		Car desplantavon boissos,
		Tant amon ortz e jardis,
	5	Aize ab pauc de compaigna :
		Sembla·is gardon d’Anssessis,
		Que ja lai on uns d’els fos,
		Non intraretz ses mesclaigna.
II		Ancaras i aura ris ;
	10	E ben leu amarant nos
		Et acuillirant los pros
		E deran dels barbaris
		Si volon c’ab lor remaigna ;
		Que ja per cridar “Paris !”
	15	Senes autras messios
		Non conqerran gen estraigna.
III		Ja non crezatz c’om ressis
		Puoig de pretz dos escalos,
		Mas al soteiran de jos
	20	Pot ben estar qetz e clis,
		Et en aquel que remaigna !
		Que per mil marcs d’esterlis
		No·n poiria poiar dos,
		Tant tem q’avers li sofraigna.
IV	25	Ben volgra·l reis fos devis
		E que passes sai mest nos
		E que saubes dels baros
		Cals l’es fals ni cals l’es fis
		E conogues la malaigna
	30	De que clocha Lemozis
		Q’era sieus, e fora·ill bos,
		Mas us sobros lo gavaigna.
V		Ben volgra·l maneschausis
		Coras q’en fos lezeros,
	35	E q’en passes dos sedos
		Anz que trop li endorzis,
		Pois q’er vengutz d’Alamaigna.
		E voill N’Aimars lo meschis
		E·N Guis fasson partizos
	40	Tan engals c’us no s’en plaigna.
VI		Marinier, ges pels Chanzis,
		Si·ls alberga·N Malmiros,
		No·m fassatz mal a rescos.
		No·us en serai plus aclis
	45	Ni pe’N Peiro La Cassaigna
		De que s’es malmenatz Guis
		Vas mi de doas preisos,
		En amor et en compaigna.
E		Papiol, ja’N Frederis
	50	Non feira aital bargaigna
		Cum fetz sos fills N’Aenris
		Qan pres romieus ab bordos,
		Don pres Poilla e Romaigna.