Gouiran, Gérard. L'amour et la guerre. L'œuvre de Bertran de Born. Aix-en-Provence: Université de Provence, 1985.

Édition revue et corrigée pour Corpus des Troubadours, 2012.

Code: 009,019 Auteur: Bertran de Born Genre: Chanson religieuse Numero: XLIII

Can mi perpens ni m'arbire

I	1	Can mi perpens ni m’arbire
		Qu’eu son ni de cal part veing,
		Meravil me mot e·m seing,
		Con Dieus volc esser soffrire
	5	Tan lonjamenz dels mieus torz.
		Mas cel qu’es verais e forz,
		Pos li plaz c’a lui me vire,
		Deing asi·l peccat ausire
		Com mos mals talans es morz.
II	10	Be·s vol de tot be devire
		Qui contra Dieu pren nuil geing,
		Que Dieus non vol c’om l’enseing.
		Cuidavam passar ab rire
		Per nostres nescis deporz.
	15	Fraire, per pauc loncs acorz
		No nos fes trop tart assire.
		Tan tost deu hom far con dire
		Lo ben, c’ades vai hom morz.
III		Que es hom, qant m’o cossire,
	20	Ni que val ? En re no·l teing.
		E doncs rics, per qe si feing ?
		Es rics ? Anz n’es trop a dire,
		Aitan es freols l’eforz
		Lo jorn c’om passa los porz
	25	On van tut ses contradire :
		Cals que·s fassa gais ni·s mire,
		A toz es comunals morz.
IV		Lo seingnor qui es complire
		De toz jois, prec c’ab nos reing !
	30	Alas del cor ! Com m’estreing
		Cant mi membron li sospire
		Deslial e·l fals conorz !
		Mas ar si camja ma sorz
		En ben, per que no·m n’aïre.
	35	Tals n’er ben leu escarnire,
		Qu’eu soi vius et el er morz.
V		Pos Dieus volc sofrir martire
		Ja nos no n’aiam desdeing,
		C’ab atretal entreseing
	40	Nos a traïz lo traïre
		Saludan ; don desconorz
		No m’es, c’al deabl’estorz
		Soi ab tan, cui fui servire.
		Non a poder plus que·m tire,
	45	Per que no·m fa paor morz.
E		Folquet, si ses contradire
		Crezes so que·us auçi dire,
		No m’agra fag paor morz,
E'		Mas a sel en soi grazire
	50	Qui per nostra mort ausire
		Deignet esser en croz morz.