Squillacioti, Paolo. Le poesie di Folchetto di Marsiglia. Pisa: Pacini, 1999.

Nuova edizione riveduta e aggiornata per il "Corpus des Troubadours", 2009.

Code: 155,013 Auteur: Folquet de Marselha Genre: Canso Numero: XX

Meravill me cum pot nuills hom chantar

I		Meravill me cum pot nuills hom chantar
		si cum ieu fatz per lieis que·m fai doler,
		qu’e ma chansso non puosc apareillar
		dos motz qu’al tertz no·m lais marritz chaser,
	5	car non sui lai on estai sos cors gens,
		doutz e plazens,
		que m’auci desiran
		e non pot far morir tant fin aman.
II		E car non puosc nuilla ren tant amar,
	10	ella, si·l platz, non deu ma mort voler,
		c’anc, puois la vi, non puoc d’alre pensar
		mas cum pogues far e dir son plazer;
		et es ben dreitz, qu’al laus dels conoissens
		es plus valens:
	15	per qu’ieu n’am mais l’afan
		de lieis servir que d’autra aver joi gran.
III		Las! ieu non l’aus mon messatge enviar,
		ni tant d’ardit non ai qu’ieu l’an vezer;
		e non o lais mas car vuoill far cuidar
	20	als fals devins qu’aillors ai mon esper:
		pero·l desirs m’es ades plus cozens
		e·l pessamens,
		car ieu no·il sui denan
		mas jongz, aclis, per far tot son coman.
IV	25	Lo mals qu’ieu trac no·m pot desconortar
		tant la fai pretz sobre totas valer,
		ni negus hom no la pot trop lauzar;
		Dieus don qu’il vuoilla humilitat aver,
		si cum en lieis es proeza e jovens,
	30	beutatz e sens,
		c’anc dompna no·n ac tan:
		doncs, cal tort n’ai s’ieu nuill’ autra non blan?
V		Bella dompna, tant vos am e·us tenc car
		que maintas vetz lo jorn no·m puosc tener
	35	c’az una part no m’an totz sols plorar,
		si qu’ieu no·m puosc d’una pessa mover,
		tal paor ai no·m vailla chausimens;
		car plus me vens
		vostr’ amors sospiran
	40	qu’eu no sai dir ni retraire en chantan.
VI		Qu’ie·us sui gairens
		plus vos am ses engan
		no fetz Yseutz son bon amic Tristan.
		Versione β
I		Meravilh me con pot nuls hom chantar
		si com yeu fas per leys que·m fay doler,
		qu’e mas chansos non puesc aparelhar
		dos motz c’al ters no·m lays marritz chazer,
	5	car no soy lay on estay sos cors gens,
		† dieus e playraus †
		que m’aussis deziran
		e com pot far murir tan fin aman.
II		E car non puesc nulha res tan amar,
	10	per tan non deu, si·l platz, ma mort voler,
		c’anc, pus la vi, non puesc en als pensar
		mas com pogues dir e far son plazer;
		et es ben dretz, c’al laus desconoyssens
		es pus valens:
	15	per qu’ieu n’am mays l’afan
		de leys servir que d’autr’ aver joy gran.
III		Mas yeu non l’aus mo messatj’ enviar,
		ni tant d’ardit non ay qu’eu l’an vezer;
		e no mo lays mas car vuelh far cuydar
	20	als fals devis c’alhors ay mon esper:
		pero·l dezir m’es ades pus plazens
		e·l pessamens,
		car yeu no·l suy denan
		mas jonhs, ades, per far tot son coman.
IV	25	Lo mal qu’ieu trac no·m pot desconortar
		tan la fay pretz sobre totas valer,
		ni negus homs non la pot trop lauzar;
		Dieus don qu’ilh vuelh’ humilitat aver,
		si com en leys es proez’ e jovens,
	30	beutatz e sens,
		c’anc dona no·n ac tan:
		doncx, cal pro l’er si m’ausi deziran?
V		Bela domna, tan vos am e·us ten car
		que mantas vetz lo jorn no·m puesc tener
	35	c’ad una part no m’an totz sols plorar,
		si qu’ieu no·m puesc d’una pessa mover,
		tal paor ay no·m valha chauzimens;
		car pus mi vens
		vostr’ amor sospiran
	40	qu’ieu no say dir ni retrayr’ e chantan.
VI		Dieus n’es guirens
		pus vos am ses enjan
		no fes Yzeutz son bon amic Tristan.