Boni, Marco. Sordello, Le poesie. Nuova edizione critica con studio introduttivo, traduzioni, note e glossario. Bologna: Palmaverde, 1954.

Code: 437,002 Auteur: Sordel Genre: Canso Numero: II

Aitant ses plus viu hom quan viu jauzens

I	1	Aitant ses plus viu hom quan viu jauzens,
		c’autre viure no·s deu vid’apellar;
		per q’ieu m’esfors de viur’ e de reinhar
		ab joi, per leys plus coratjozamens
	5	servir q’ieu am, quar hom que viu marritz
		non pot de cor far bos faitz ni grazitz;
		doncx er merces si·m fai la plus grazida
		viure jauzens, pus als no·m ten a vida.
II		Tant pes en lieys e tan l’am coralmens
	10	que nueyt e jorn tem mi falh’al pensar,
		quar de beutat ni de pretz non a par,
		per que·l devon esser obediens
		las plus prezans; quar enaissi es guitz
		per dreg guidar, sos gens cors ben aibitz,
	15	las pros en pretz, cum las naus en mar guida
		la tramontana e·l fers e·lh caramida.
III		E puys guida·l ferm’estela luzens
		las naus que van perillan per la mar,
		ben degra mi cil, qi·l sembla, guidar,
	20	qu’en la mar suy per lieys profondamens
		tant esvaratz destreitz et esbaitz,
		qe·i serai mortz ans que·n hiesc’e peritz,
		si no·m secor, quar non truep a l’yssida
		riba ni port, gua ni pont, ni guerida.
IV	25	Dura merces e trop loncx chauzimens
		me fan murir per sobre dezirar,
		quar ieu no puesc ses lo joy vius durar
		qu’ie·l quier sirven aman ab tals turmens
		que·l jorn mil vez volri’esser fenitz,
	30	tan mi destreing lo dartz don sui feritz
		al cor d’Amor, per qe·l mortz m’es ayzida
		car il no·n es tot eissamen ferida.
V		Las! don li ven de mi aucir talens,
		pos q’ill no·m pot en nulh forfach trobar,
	35	e ja per mal que·m sapcha dir ni far,
		non puosc esser de lleis amar partens?
		Doncx, e que·lh val si·m fai mal ni·l me ditz?
		C’aissi·l sui ferms autreiatz e plevitz;
		qu’enans sera m’arma del cors partida,
	40	qu’ieu me·n parta, tan l’am d’amor complida.
VI		N’Agradiva, dompna de pretz razitz,
		de cor, de cors e de faitz e de ditz
		suy vostres totz, quar etz la mielhs aybida
		neta e plazens, suaus et yssernida.
VII	45	Per Dieu, aiatz merce, dompna grazida,
		de me, qu’en vos es ma mortz e ma vida.