Arveiller, Raymond; Gouiran, Gérard. L’œuvre poétique de Falquet de Romans, troubadour. Aix-en-Provence: C.U.E.R. M.A. - Université de Provence, 1987.

Édition revue et corrigée pour Corpus des Troubadours, 2013.

Code: 156,008 Auteur: Falquet de Romans Genre: Canso Numero: II

Ma bella dompna, per vos dei esser gais

I	1	Ma bella dompna, per vos dei esser gais,
		c’al departir me dones un dolz bais
		tan dolzamen lo cor del cors me trais.
		Lo cor avez, dompna, q’eu lo vos lais
	5	per tal coven q’eu no·l voill cobrar mais,
		qe meill no·n pres a Raol de Cambrais
		ne a Flori, qan poget el palais,
		com fez a mi, car soi fins et verais,
		ma bella dompna.
II	10	Ma bella dompna, a vos me valla Deus !
		qe mill aitanz soi meill vostre qe meus,
		obedïenz plus qe sers ni judeus,
		et de vos teng mon aloc et mos feus
		et nuls trabals no me pot esser greus ;
	15	sol c’a vos plaza, anz m’es plasenz et leus ;
		et morrai tot aissi com fes N’Andreus
		et valgra mais q’agues mort vint romeus,
		ma bella dompna.
III		Ma bella dompna, ja vos am eu tan fort,
	20	se no vos ai, venguz soi a mal port,
		q’eu ai ben vist et conegut en sort
		q’en breu de temps m’auran li sospir mort
		se eu a vos en chambra no·m deport.
		Ha ! dolza res, vostre cor s’i acort
	25	qe ren sen vos no me pot dar conort ;
		s’enaissi mor, pechaz n’aurez et tort,
		ma bella dompna.
IV		Ma bella dompna, no me laissaz morir,
		qe mil aitant vos am q’eu no sai dir
	30	qe nulla ren non am tan ne desir
		com eu faz vos, per cui plang et sospir.
		Lo danz er vostre s’enaissi·m faz languir.
		Qan plus vos vei, mas vos ve enbelir.
		Nafrat m’avez, no sai tant d’escremir,
	35	ab dolz esgart et ab gent acoillir,
		ma bella dompna.
V		Ma bella dompna, de vos soi enveios,
		sabez per qe ? qar es valenz et pros
		et gen parlant et d’avinent respos,
	40	c’om no vos ve qe non si’amoros,
		qe Deus vos de cors ab bellas faichos
		et ja no·us pes, s’en soi un paoc gelos
		qe per amor fu vencuz Salamos,
		aissi soi eu, cortesa res, per vos,
	45	ma bella dompna.