Arveiller, Raymond; Gouiran, Gérard. L’œuvre poétique de Falquet de Romans, troubadour. Aix-en-Provence: C.U.E.R. M.A. - Université de Provence, 1987.

Édition revue et corrigée pour Corpus des Troubadours, 2013.

Code: 156,014 Auteur: Falquet de Romans Genre: Canso-sirventes Numero: III

Una chanso sirventes

I	1	Una chanso sirventes
		a ma dona trametrai,
		c’anc pueis d’alres non pensai
		pos parti de Vianes
	5	mas de sa beutat complia,
		c’ades mi sove del dia
		qu’ela·m dis : “Bels dous amicx,
		vai tost e guarda no·t tricx,
		si vols que morta no sia”.
II	10	Senhors, e no·m n’es ben pres
		quar la plus bela qu’ieu sai
		m’a dig so que dig vos ai ?
		Jamais no·m devede res,
		c’ab leis ai tot quan volia
	15	d’amor e de drudaria,
		malgrat de mos enemicx.
		Anc no fo de joi tan ricx
		Floris, quan jac ab s’amia.
III		Per gen sufrir ai conques
	20	de midons tot quan mi plai,
		e quar me trobet verai,
		me det mais que no·m promes
		e·m tornet al cor la via.
		Anc no mi noc gelozia
	25	ni fals lauzengiers enicx
		que n’an faitz mains fals predicx,
		mas ela no·ls en crezia.
IV		De mon senhor lo marques
		de Monferrat, vos dirai
	30	que mal m’er quan m’en partrai,
		tant es savis e cortes
		e de bela companhia.
		Mas, qui ver en jujaria,
		ver dis lo reis Fredericx
	35	que mester hi auria picx,
		qui l’aver trair’en volria.
V		Et anc Lombartz tant no mes
		per pretz, qui ver en retrai,
		com fes sos paire, que fai
	40	gran sofrait’a nos, cortes.
		Cant anet en Romania,
		tenc largueza ab lui sa via,
		e mal aia Salonix !
		Tans en fai anar mendicx
	45	e paubres per Lombardia !
VI		Malespina, guarentia
		vos port que granre d’amicx
		avetz e pauc d’enemicx
		lai on renha cortezia.