Arveiller, Raymond; Gouiran, Gérard. L’œuvre poétique de Falquet de Romans, troubadour. Aix-en-Provence: C.U.E.R. M.A. - Université de Provence, 1987.

Édition revue et corrigée pour Corpus des Troubadours, 2013.

Code: 156,003 Auteur: Falquet de Romans Genre: Canso Numero: IV

Cantar vuoill amorosamen

I	1	Cantar vuoill amorosamen,
		si tut no vei fuogllia ni flor,
		ci freç no fai ni gel paor,
		tant ai lo cor gai e gausen,
	5	e autressi·m plai alegrars
		d’ivern com d’estiu o cantars,
		puois per servidor mi rete
		tals c’es conplida de tot be.
II		Anc dompna non vic tan plaisen
	10	ni ab tan entera lausor,
		et a be plus fressca color
		ce rosa ni flors d’angilen
		bella bocha, bels uogltç e nars,
		et estai li tant gien parlars
	15	c’a nuls tenps no vos dira re
		mas onors e plasers e be.
III		E sapciatç c’anc plus coralmen
		non amet Floris Blanciflor
		c’ieu am lieis ce·m val e·m socor ;
	20	e no·i son privatç d’avoll gen ;
		gia mi no plai aprivasars
		ab om croi ni trop consigliars
		ab lausengier, car ci los cre
		pro fai de mall e pauc de be.
IV	25	Ogonet, porta·m per present
		ma canson a l’emperador,
		c’el sap ben triar lo megllior,
		tant a de valor e de sen ;
		e par ben als sieus rics afars
	30	s’el s’es pros, c’anc no fo sos pars ;
		c’on pluss o retra qe lo ve,
		adess i trop eu mais de be.
V		Emperaire, bels segner cars,
		no cre ce sia plus francs bars
	35	del cont del Caret, que mante
		pretç e fai tuz giortç mais de be.