Boni, Marco. Sordello, Le poesie. Nuova edizione critica con studio introduttivo, traduzioni, note e glossario. Bologna: Palmaverde, 1954.

Code: 437,007 Auteur: Sordel Genre: Canso, Cobla avec tornada avec réponse Numero: IV

Bel m'es ab motz leugiers a far

I	1	Bel m’es ab motz leugiers a far
		chanson plazen et ab guay so,
		que·l melher que hom pot triar,
		a cuy m’autrey e·m ren e·m do,
	5	no vol ni·l plai chantar de maestria;
		e mas no·lh plai, farai hueymais mon chan
		leu a chantar e d’auzir agradan,
		clar d’entendre e prim, qui prim lo tria.
II		Gen mi saup mon fin cor emblar,
	10	al prim qu’ieu miriey sa faisso,
		ab un dous amoros esguar
		que·m lansero siey huelh lairo.
		Ab selh esguar m’intret en aisselh dia
		Amors pels huelhs al cor d’aital semblan,
	15	que·l cor en trays e mes l’a son coman,
		si qu’ab lieys es, on qu’ieu an ni estia.
III		Ai, cum mi saup gent esgardar,
		si l’esgartz messongiers no fo,
		dels huelhs que sap gent enviar
	20	totz temps per dreg lai on l’es bo;
		mas a sos digz mi par qu’aiso·s cambia:
		pero l’esgar creirai; qu’ab cor forsan
		parl’om pro vetz, mas nulh poder non an
		huelh d’esgardar gen, si·l cor no·ls envia.
IV	25	E quar am de bon pretz ses par,
		am mais servir lieys en perdo
		qu’autra qu’ab si·m degnes colgar;
		mas no la sier ses guazardo,
		quar fis amicx no sier ges d’aitai guia,
	30	quan sier de cor en honrat loc prezan:
		per que l’onors m’es guazardos d’aitan,
		que·l sobreplus non quier, mas be·u penria.
V		Vailla·m ab vos merce[s], dolza enemia,
		no m’auziez, s’eu vos am ses enjan:
	35	qe me suffratz qe·us serv’ab ferm talan,
		tal don deman, ni estre non deuria.