Boni, Marco. Sordello, Le poesie. Nuova edizione critica con studio introduttivo, traduzioni, note e glossario. Bologna: Palmaverde, 1954.

Code: 437,017 Auteur: Sordel Genre: Canso Numero: VII

Gran esfortz fai qui ama per amor

I	1	Gran esfortz fai qui ama per amor
		trop, e ve pauc lieys on a son cor mes,
		s’a vida·s trai, venha l’en mals o bes,
		quar per quascu mor, languen, de dezire
	5	que·l mal[s] l’auci per lo ben esperan,
		e·l ben[s] per miels, tan lo vai deziran;
		per qu’amans fis no viu ses greu martire
		pus del vezer sidons non a legor.
II		Quan pes quo am de totz bos ayps la flor
	10	e·l gaug qu’ieu n’ay, vezen lieys que·m ten pres
		meravil me cum defendre·m pot res
		que·l cor no·m part de dol e de martire,
		quar non la vei, los plazers remembran
		que ylh sap far e dir, s’onor salvan,
	15	retenen grat de qual que la remire,
		honran quascu segon qu’es sa valor.
III		Aman m’auci e·m turment’ab dolor
		pel joy que·m lonha, e no mi val merces;
		mas endreg mi ieu no·m deg clamar ges,
	20	quar, pus sieus suy, be·m pot, si·l plai, aucire;
		e si m’auci, no·m forfai tan ni quan,
		que·ls dans prenc totz, mas per so planc, c’aman
		no poirai mais sos plazers far ni dire,
		ni ylh trobar tan fizel amador.
IV	25	Hon qu’ieu estey, lai sopley et azor
		on ylh estai, que plai als fis cortes
		sobre totas las pros, tan plazens es
		de cors, de cor e d’esgartz e de rire,
		que·l cors a gras, delgat e de bel gran,
	30	la car’humil, fresca, ab bel semblan,
		don plor la nueg, e·l jorn planc e sospire,
		quar am selh joy qu’ieu dezir no·m secor.
V		Enaissi l’am e·l prec, salvan s’onor,
		qu’el mon non es nulha res qu’ieu prezes,
	35	per que sos cors ni sos pretz meyns valgues:
		mais am murir que ja Dieus tan m’azire;
		qu’ie·m tenc d’amor per paguatz ab aitan,
		savals d’aquo qu’ieu dezir, qu’autr’aman
		non tem; qu’ieu puosc’en ma senh’, on qe·m vire,
	40	cridar: segur! merce de la gensor.
VI		Gies non istauc tan pres d’autra presan
		[no sia] el mieg cilh qu’ieu am; per que gran
		esfors no fas s’autr’amor non desire;
		car qui lais’aur per estayn fai folor.
VII	45	Part autr’aman gard eu trop greu martire,
		car ieu am trop e vegg pauc la gensor.