Boni, Marco. Sordello, Le poesie. Nuova edizione critica con studio introduttivo, traduzioni, note e glossario. Bologna: Palmaverde, 1954.

Code: 437,023 Auteur: Sordel Genre: Canso Numero: VIII

Per re no·m puesc d'amor cuydar

I	1	Per re no·m puesc d’amor cuydar
		qu’enquer non aya jauzimen,
		qu’anc no·m fes amar per nien
		tan lonjamen, ses cor camjar,
	5	la plus corteza e la plus guaya
		e la plus plazen que Dieus aya
		per que·lh grazisc los mals qu’ieu tray
		pels plazers qu’aten que n’auray.
		Be grazirai doncx, quan venran,
	10	los bes, pus los mals grazisc tan.
II		Be mi dey doncx d’amor lauzar,
		que·m fes chauzir la plus valen
		del mon e la plus conoyssen
		qu’ab ben dir et ab gen parlar
	15	te tota la gen et apaya,
		gardan son bon pretz que non chaya.
		Per qu’ieu fatz orguelh ben o sai,
		quar l’am; mas, per Dieu, no·n puesc may;
		qu’aitan be pot far fin aman
	20	amors del petit cum del gran.
III		Doncx non deu trop ricor gardar
		dona, quar un non a en cen
		ric home que am finamen,
		ans cuian qu’om los dey’amar,
	25	per qu’ieu prec midons que no·lh playa
		ricx hom, ni vas si non l’atraya,
		quar tost ven s’amors e leu vay;
		mas a mi que no suy ricx play,
		que·l mals qu’ieu trac per lieys tot l’an
	30	m’es honors si tot m’i ai dan.
IV		Ab tot’autra gent sai estar,
		e sai aver captenemen;
		mas ab lieis que·m fora plus gen
		no sai que·m dey dire ni far;
	35	qu’ieu non ay l’ardit que·lh retraya
		cum l’am de fin’amor veraya:
		sabetz per que? quar paor ai
		que l’aculhir e·l solatz guay
		qu’elha·m fai e lo bel semblan
	40	perdes, si l’anava preyan.
V		Sabetz a que pot hom triar
		bona dompna qu’a pretz valen?
		Quan degus non a l’ardimen
		que l’auze s’amor demandar;
	45	mas quant ela es fol’e savaya,
		quascus la preya e l’asaya,
		e sembla que alcus li play
		als fols captenemens qu’ilh fay;
		mas a bona dompna prezan
	50	auza hom greu dir son talan.
VI		S’ista chanso[s] a midons plai,
		ieu ai en cor qu’en fassa may.