Boni, Marco. Sordello, Le poesie. Nuova edizione critica con studio introduttivo, traduzioni, note e glossario. Bologna: Palmaverde, 1954.

Code: 437,035 Auteur: Sordel Genre: Canso Numero: XI

Tant m'abellis lo terminis novels

I	1	Tant m’abellis lo terminis novels
		e tant m’es greu car mor chans e deportz,
		q’ieu chantarai, e fatz hi gran esfortz,
		tant ai estat pensius e malanans,
	5	car chai a pans
		tot so q’alz amoros
		de far chanssos
		solia esser enans:
		dompneis e mans
	10	grazirs e guizerdos;
		per que nuills chans
		non pot esser prezatz;
		tant es mermatz
		jois e totz faitz prezans.
II	15	Pero per tal m’es al cor us cairels,
		c’a fabregat desirs e temprat mortz,
		qe·m fai chantar, car us plazens conortz
		mi ten gauzen, cum qe·m trebail l’afans;
		car tant es grans
	20	l’onratz pretz enveios,
		al laus dels pros,
		de lieis cui sui amans,
		qe·l dols pesans
		m’en es gaugz, e·l dans pros;
	25	per c’am mil tans
		viure ab lieis trebaillatz
		e tormentatz,
		c’ab autra benanans.
III		Que, si tot s’es sos cors gais et isnels
	30	e frescs e nous, lo sens es vieills e fortz;
		qu’il es als crois fera e de durs acortz,
		et als valens humils, gen acordans:
		per qe·l trenchans
		mals, q’ie·n trac, angoissos,
	35	m’es ben joios
		qan ie·n sui remembrans;
		car mos talans
		non es d’als volontos
		mas c’a mos ans
	40	reing a sas voluntatz:
		tant fui lassatz
		qan la vi al prim lans.
IV		Sos volers es de mon fin joi capdels,
		car d’autra part no·m ven jois ni confortz
	45	mas de servir lieis per cui sui estortz
		d’avol merce; que·l sieus cors benestans,
		francs, gen parlans,
		humils et orgoillos,
		m’acor qu’eu fos
	50	faich gais de dol clamans,
		sol que, chantans,
		sofra q’ieu sos aips bos
		diga, et enans
		sos pretz e sas beutatz,
	55	on creis vertatz,
		on hom plus n’es lauzans.
V		E, pois tant val sos nous plazens cors bels,
		que ses par viu, merce·ill clam qu’il s’esfortz
		de mantener lo pretz d’entre·ls dos portz,
	60	c’a si conques e mes a sos comans
		ab gais semblans
		et ab digz saboros,
		et ab cor blos
		de totz faitz malestans,
	65	et ab trians
		entiers aips cabalos,
		que contrastans
		no·i a; tant es poiatz
		sos pretz honratz,
	70	grazitz pels agradans.
VI		Dompna, al prim lans
		q’ieu vi·l gen cors de vos,
		vostras faissos
		m’entaillet per semblans
	75	al cor, trenchans,
		Amors, per q’ie·m sui datz
		a so qe·us platz
		fins, ferms a totz mos ans.