Javascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.com

* Introduction

* Présentation
* Bibliographie
* Témoignage
* Appareil critique
* Notes
* Traductions
* Images

Loporcaro, Michele. "Be·m platz lo gais temps de pascor" di Guilhem de Saint Gregori. "Studi Mediolatini e Volgari", 34 (1988), pp. 27-68.

Code: 080,008a Auteur: Guillem de Saint Gregori Genre: Sirventes Numero: -

Be·m platz lo gais temps de pascor

I
1
Be·m platz lo gais temps de pascor
   
qan vei foillas e flors venir,      
   
e platz me qand auch la baudor         
   
dels auzels que fant retentir
 
5
     lor chan per lo boscatge,
   
e platz me qand vei sobre·ls pratz     
   
tendas e pavaillons fermatz,
   
     e platz m’ en mon coratge
   
qand vei per campaigna rengatz
 
10
cavalliers e cavals armatz.
     
II
 
E platz mi qan li corredor
   
fant las gens e l’aver fugir,
   
e platz me qan vei apres lor
   
gran ren d’armatz ensems venir,
 
15
     et ai gran alegratge
   
qan vei fortz chastels assetgatz
   
e·ls barris rotz et esfondratz,   
   
     e vei l’ost el ribatge
   
q’es tot entorn claus de fossatz
 
20
ab lissas de fortz pals serratz.
     
III
 
Et atressi·m platz de seignor
   
qand es primiers a l’envazir
   
en caval armatz ses temor,
   
c’aissi fai los sieus enardir
 
25
     ab valen vassalatge.
   
E qand er en l’estor intratz      
   
chascus deu esser acesmatz
   
     de segre·l d’agradatge:
   
car nuills hom non es ren presatz
 
30
tro q’a mains colps pres e donatz.
     
IV
 
Massas e brans, elms de color,
   
escutz trancar e desgarnir        
   
veirem a l’intrar de l’estor,       
   
e mainz vassals ensems ferir.    
 
35
     don anaran aratge
   
caval dels mortz e dels nafratz.
   
E pueis qe l’estorms er mesclatz,
   
     chascus hom de paratge
   
non pens mas d’asclar caps e bratz:
 
40
car mais val mortz que vius sobratz!
     
V
 
Be·us dic que tant no m’a sabor
   
maniar ni beure ni dormir        
   
coma qand auch cridar «A lor!»
   
d’ambas las partz, et auch egnir
 
45
     cavals voitz per l’ombratge,
   
et auch cridar «Aidatz! Aidatz!»
   
e vei cazer per los fossatz
   
     paucs e grans per l’erbatge,
   
e vei los mortz que pels costatz
 
50
ant los troncons ab los cendatz.
     
VI
 
Pros comtessa per la meillor
   
qe hom puesca el mon chauzir
   
vos ten hom e per la gensor
   
qe anc se mires ni se mir.
 
55
     Biatritz d’aut paratge,
   
bona dompna en digz e en fatz,
   
fonz lai on sorz tota beutatz,
   
     bella ses maestratge,
   
vostre rics pretz es tant poiatz
 
60
que sobre totz es enanssatz.
     
t
 
Barons metetz en gatge
   
castels e vilas e ciutatz,
    enans c’usquecs no·us gerreiatz.

 

 

Institut d'Estudis Catalans. Carrer del Carme 47. 08001 Barcelona.
Telèfon +34 932 701 620. Fax +34 932 701 180. informacio@iec.cat - Informació legal

UAI