Boni, Marco. Sordello, Le poesie. Nuova edizione critica con studio introduttivo, traduzioni, note e glossario. Bologna: Palmaverde, 1954.

Code: 437,020 Auteur: Sordel Genre: Sirventes avec réponse Numero: XXIV

Lo reproviers vai averan, so·m par

I	1	Lo reproviers vai averan, so·m par,
		d’ome escaudat qui tem tebe ancse:
		c’us fals volpills qe·is fai a det mostrar,
		tant fort se feing, a pres de sobre se
	5	mon sirventes, de cui qez eu faich l’aia,
		car en son cor sap totz los mais qe·i son;
		e pois per sieu lo pren, qui qe·l retraia,
		far l’ai l’onor q’a lui l’autrei e·l don.
II		Ges no·m degra de bausia reptar,
	10	q’ieu sui leials, et el tant fals, q’en re
		non ausaria ad un gat tornas far,
		ni·s faria el del dreich c’auria be;
		c’om que anc jorn non fetz colp ni pres plaia
		no m’es semblan pogues far nuill faich bon;
	15	car aitant tost cum el s’arma, s’esglaia,
		c’anc hom d’aital fantonia non fon.
III		Ben a gran tort car m’apella joglar,
		c’ab autre vai et autre ven ab me,
		e don ses penre, et el pren ses donar,
	20	q’en son cors met tot qant pren per merce;
		mas eu non pren ren don anta m’eschaia,
		anz met ma renda e non vuoill guizerdon
		mas sol d’amor; per qe·m par q’el dechaia
		et eu poje, qui nos jutga a razon.
IV	25	Car sol si sap peigner et afaitar,
		e car se feing tot jorn non sap de que,
		e car se sap torser e remirar,
		cre qe·is n’azaut tota dompna de se;
		mas eu non crei que pros dompna s’atraia
	30	vas tant vil cors per tant vil ochaison,
		mas car als crois si taing dompna savaia,
		trobar la pot sus el castel Babon.
V		En luoc d’ausberc fai camis’aredar,
		e per caval vol amblan palafre,
	35	et en luoc d’elm fai capiron fresar,
		e per escut pren mantel e·l rete;
		e, si per so·ill don Amors ren qe·il plaia,
		reptar pot hom Amor de tracion:
		mas non o fai mas per semblanssa gaia
	40	lo fals feignens, car alres no·il ten pron.
VI		Gen l’a saubut lo valens coms onrar
		de Tolosa, si co·is taing ni·s cove,
		c’a Marseilla l’a faich azaut tornar,
		per que laisset son seignor e sa fe;
	45	mas el no tem vergoigna, ni s’esmaia
		don degr’estar marritz tota sazon
		lo fals volpills q’a nom, car pauc s’essaia,
		« Cor de conill ab semblan de leon ».