Arveiller, Raymond; Gouiran, Gérard. L’œuvre poétique de Falquet de Romans, troubadour. Aix-en-Provence: C.U.E.R. M.A. - Université de Provence, 1987.

Édition revue et corrigée pour Corpus des Troubadours, 2013.

Code: 132,008 Auteur: Falquet de Romans Genre: Canso Numero: XV

Mas camjat ai de far chanso

I	1	Mas camjat ai de far chanso
		de midons cuy am e dezir,
		a lieys o deuria grazir
		si ja fas bos motz ni guai so ;
	5	oc ! e s’ieu mais de ben fazia,
		grazit fos a ma douss’amia,
		quar de lieys tenc un pauc de ben que ai,
		pero, si·l platz, encaras n’aurai mai.
II		Bona dompna, mas vostr’om so
	10	qu’autre no·us me pot guerentir,
		laissaretz mi del tot murir
		d’aisso don mi podetz far do ?
		S’o faitz, vos faretz vilania,
		e parra un ram de feunia
	15	qui son home fi, leyal, murir fai
		de dezirier ni·l pot gitar d’esmay.
III		Amia, si Dieus mi perdo,
		trop vos am mais qu’ieu no sai dir,
		qu’ieu en pert solatz e durmir,
	20	que rire ni als no·m te pro ;
		mas tan que tornatz suy en via
		de chantar dont ieu me partia,
		q’ieu chant aras d’aisso don mil vetz ai
		plorat ; ben tanh, mas a ma dona plai.
IV	25	Anc hom mais tan forsatz no fo
		d’amor, e no m’en puesc partir ;
		e, si·m faitz finament languir,
		mais am en vostra sospeisso
		estar que si d’autra·m jauzia ;
	30	jauzir non es, quar no·m poiria
		autra dompna tener jauzent ni guay
		ni tot lo mon, dompna, de vos en lay.
V		No sai far mon be ni mon pro
		ab nul’autra, quan m’o cossir,
	35	e ja no·y vuelh esdevenir
		s’ieu no·us bays la boc’e·l mento
		de vos cuy am senes bauzia ;
		e no crey mais tals amors sia
		que, mal que·us pes, vos am e·us amarai
	40	e malgrat mieu, pos amors m’o atrai.
VI		En vostra bona merce sia,
		qu’ieu no·m recre ni ja no·m recreirai
		de vos amar, ni nulh poder no·n ai.
VII		A vos cuy am ma chansos sia
	45	e totz mos sens e ma paria,
		qu’autra dompna no crey ni tem ni ai
		ni vos non ai ni sai si ja·us aurai.