Arveiller, Raymond; Gouiran, Gérard. L’œuvre poétique de Falquet de Romans, troubadour. Aix-en-Provence: C.U.E.R. M.A. - Université de Provence, 1987.

Édition revue et corrigée pour Corpus des Troubadours, 2013.

Code: 155,013 Auteur: Falquet de Romans Genre: Canso Numero: XVI

Meravil me cum pot nuills hom chantar

I	1	Meravil me cum pot nuills hom chantar
		si cum ieu fatz per lieis qe·m fai doler,
		qu’e ma chansso non puosc apareillar
		dos motz q’al tertz no·m lais marritz chaser,
	5	car non sui lai on estai sos cors gens,
		doutz e plazens,
		que m’auci desiran,
		e non pot far morir tant fin aman.
II		E car non puosc nuilla ren tant amar,
	10	ella, si·l platz, non deu ma mort voler,
		c’anc, puois la vi, non puoc d’alre pensar,
		mas cum pogues far e dir son plazer ;
		et es ben dreitz, q’al laus dels conoissens
		es plus valens ;
	15	per q’ieu n’am mais l’afan
		de lieis servir que d’autra aver joi gran.
III		Las ! ieu non aus mon messatge enviar
		ni tant d’ardit non ai q’ieu l’an vezer ;
		e non o lais mas car vuoill far cuidar
	20	als fals devins q’aillors ai mon esper ;
		pero·l desirs m’es ades plus cozens
		e·l pessamens,
		car ieu no·il sui denan,
		mans joingz, aclis, per far tot son coman.
IV	25	Lo mals q’ieu trac no·m pot desconortar,
		tant la fai pretz sobre totas valer,
		ni negus hom non la pot trop lauzar ;
		Dieus don qu’il vuoilla humilitat aver
		si cum en lieis es proeza e jovens,
	30	beutatz e sens,
		c’anc dompna no·n ac tan ;
		doncs, cal tort n’ai, s’ieu nuill’autra non blan ?
V		Bella dompna, tant vos am e·us tenc car
		que maintas vetz lo jorn no·m puosc tener
	35	c’az una part no·m n’an totz sols plorar,
		si que no·m puosc d’una pessa mover,
		tal paor ai no·m vailla chausimens,
		car plus me vens
		vostr’amors sospiran
	40	q’eu no sai dir ni retraire en chantan.
VI		Q’ie·us sui garens
		plus vos am ses engan
		no fetz Yseutz son bon amic Tristan.