Dejeanne, Jean Marie Lucien. Poésies complètes du troubadour Marcabru. Toulouse: Édouard Privat, 1909.

Code: 293,008 Auteur: Marcabru Genre: Vers Numero: VIII

Assatz m'es bel del temps essuig

I	1	Assatz m'es bel del temps essuig,
		Quand la douz gem e la fonz bruig
		E son li prat reverdezit,
		Pesa·m de Joven car s'en fuig,
	5	C'a penas troba qui·l convit.
II		Ben son l'enganador destruig,
		Can l'uns pechat a l'autr' aduig,
		El fuoc del malign esperit,
		Que fai dir de l'enfan : « so·m cuig,
	10	Mieus es », ditz cel que l'a noirit.
III		Savis es qui lo fuoc destreing,
		Qu'estra grat sobre lui non reing,
		Que puois a lo fuocs envazit
		Son ardimen, c'ad el si gleing,
	15	Tart remanra senes mal crit.
IV		Moillerat, segon l'endeveing,
		Que·us es a venir vos enseing,
		Mas si m'avetz espaorit
		C'usquecs n'a son coratge feing,
	20	Per que no m'es engal grazit.
V		A ! cum fo tan fer ni esquiu
		Q'estrains quezes en autrui niu !
		Mas aras s'en son esbaudit
		Si qu'el camin descobertiu
	25	Van assegurat e plevit.
VI		Tant cremon lo feu qu'ieu vos diu,
		La flama la bras' e·l caliu
		C’ar de tant se son enferzit
		Que bravas en son e braidiu
	30	Las moillers e·il drut e·il marit.
VII		Qui m'entend[r]ia s'ieu die be ?
		Q'ara·m membra de que·m sove,
		D'un volpillatge e d'un ardit
		C'ai agut, puois fui pros ancse
	35	Et ancaras no m'a giquit.
VIII		De sol la paor ai faich fre
		Que majormen aura faich me
		Plus fort d'un caval arabit,
		E si l'agues faich d'autra re,
	40	Mos ardimens m'agr' enriquit.
IX		Mon volpillatge teing tant car
		Qu'el m'enseigna de cui mi gar
		De gran fol e d'enfan petit,
		E dei me tres vetz doctrinar
	45	Mon affar anz que si' auzit.
X		Mon ardimen non dei laissar
		Ni creire de tot mon affar,
		Ni nuills autre no m'a desdit
		Que leu de mon privat disnar
	50	(C')aventura de joi partit.
XI		Moillerat tuich estatz a frau
		Que chascus rendetz mau per mau
		Mas tot vos er contramerit
		Et ieu guiarai ves Angau.
XII	55	Guianna ! cridon en Peitau
		Valia dissend contr' avau !
		E qui d'escaravaich fai guit
		En avol luoc perpren ostau.
XIII		Per so, son Angevin aunit,
	60	E qui d'escarabot fai guit
		En avol loc perpren ostau.