Dejeanne, Jean Marie Lucien. Poésies complètes du troubadour Marcabru. Toulouse: Édouard Privat, 1909.

Code: 293,011 Auteur: Marcabru Genre: Vers Numero: XI

Bel m'es quan la rana chanta

I	1	Bel m'es quan la rana chanta
		E·l sucs pueja per la rusca,
		Per que·l flors e·l fueilhs e·l busca
		E·l frugz reviu en la planta,
	5	E·l rossinhols crid' e brama
		Sa par qu'a per joi conquisa,
		Ples d'orgueilh car el no sen
		Freg ni gel ni glaz ni bisa.
II		Non aus so que m'atalanta
	10	Dir d'una gen que·s fa cusca,
		Cui Malvestatz franh e frusca ;
		Qu'entre mil no·n trueb quaranta
		De cells cui Proeza ama.
		Qu'en un castell l'an assiza
	15	E trazon i ben ab cen
		Peiriers cill qui l'an revisa.
III		Pres es lo castells e·l sala,
		Mas qu'en la tor es l'artilla
		On Jois e Jovens e silla
	20	Son jutjat a pena mala ;
		Qu'usquecs crida « fuec e flama !
		Via dinz e sia prisa !
		Degolem Joi e Joven
		E Proeza si' aucisa. »
IV	25	Senher, ben hi a gran tala
		Si mor ses fill o ses filha !
		Retengam per meravilha
		Lo bec o l'ongl' o l'ala,
		Quar de pauc albr' eis grantz rama
	30	Quan bona pugn' i es misa,
		Per qu'ieu n'esper e n'aten
		Lo frut aprop la semisa.
V		Non vueilh far paraula lonja :
		Preza es la francha causa
	35	E non troba fin ni pauza
		Si no·s met reclus' o monja,
		E pos chascus la derama
		E las denz li franh e brisa,
		Ieu non i trueb mas paren
	40	De Portogal tro en Friza.
VI		Duc e rei senes messonja
		Ll'an primier la boca clausa,
		Qu'ill fan de pauc fag gran nauza
		Quar Donars lur fai vergonha ;
	45	Tan tem quecs que falha trama
		Per qu'en lur cortz non es visa
		Copa ni enaps d'argent,
		Mantells vairs ni pena griza.
VII		Maritz qui l'autrui con grata
	50	Ben pot saber que·l sieus pescha
		E mostra com hom li mescha,
		Qu'ab eis lo sieu fust lo bata,
		Et aura·n tort si s'en clama,
		Car drech e raços deviza
	55	Que qui car compra car ven,
		Ar, segon la lei de Piza.
VIII		D'aqui nais l’avols barata,
		Ric cui mortz e Dieus descresca !
		Qu'us non fai condug ni tresca;
	60	Non sia lauzenja plata
		Cell qui sa maisnad' afama ;
		Cest vest la blancha camiza
		E fai son seinhor sufren
		E ten si dons a sa guiza.
IX	65	Alegretz, folls, en qual quiza
		Cujas far d'avol valen
		Ni de gonella camiza ?
		(Dans M seulement.)
		Antz co·s pot ? levan cazen
		Qual gonella qual camiza.