Audiau, Jean. La Pastourelle dans la poésie occitane du Moyen Âge. Paris: E. de Boccard Éditeur, 1923.

Code: 244,008 Auteur: Guiraut d'Espanha Genre: Pastorela avec la forme d'une dansa Numero: XVIII

Per Amor soi gai

I		Per Amor soi gai,
		E no·m n'estrairai
		Aitan quan viurai,
		Na Cors Covinen.
II	5	Eu·m levei un bon mati
		Enans de l'albeta;
		Anei m'en en un vergier
		Per cuillir violeta,
		Et auzi un chan
	10	Bel, de luenh; gardan,
		Trobei pastorela
		Sos anhels guaran.
III		— « Dieu vos sal, Na pastorela,
		Color de rozeta.
	15	Fort me meravill de vos
		Com estaitz soleta.
		Bliaut vos farai,
		Si penre·l vos plai,
		Menudet cordat
	20	Ab filetz d'argen ».
IV		— « Per fol vos ai, cavalier,
		E plen d'auradura,
		Quar vos de mi demandas
		So don non ai cura.
	25	Pair' e maire ai,
		Et marit aurai,
		E, si a Dieu plai,
		Far m'aun onramen.
V		— A Dieu, a Dieu, cavalier,
	30	Que mon paire·m crida,
		Qu'ieu lo vei la jus arar
		Ab bueus sel' artigua,
		Que semenam blatz;
		Cuillirem n'asatz,
	35	E, si acaptatz,
		Dar vos em fromen ».
VI		— E quant el l'en vit anar,
		Met se apres ela,
		Pres la per la blanqua man,
	40	Gieta l'en l'erbeta;
		Tres vetz la baizet;
		Anc mot non sonet;
		Quan venc al quartet:
		« Senher, vos mi ren ».