Appel, Carl. Bernart von Ventadorn, seine Lieder, mit Einleitung und Glossar. Halle a. S.: Verlag von Max Niemeyer, 1915.

Code: 070,017 Auteur: Bernart de Ventadorn Genre: Canso Numero: XVII

En cossirer et en esmai                                                                                    

I	1	En cossirer et en esmai
		sui d’un’ amor que·m lass’ e·m te,
		que tan no vau ni sai ni lai
		qu’ilh ades no·m tenh’ en so fre,
	5	c’aras m’a dat cor e talen
		qu’eu enqueses, si podia,
		tal que, si·l reis l’enqueria,
		auria faih gran ardimen.
II		Ai las, chaitius ! e que·m farai ?
	10	ni cal cosselh penrai de me ?
		qu’ela no sap lo mal qu’eu trai
		ni eu no·lh aus clamar merce.
		fol nesci ! ben as pauc de sen.
		qu’ela nonca t’amaria
	15	per nom que per drudaria,
		c’ans no·t laisses levar al ven.
III		E doncs, pois atressi·m morrai,
		dirai li l’afan que m’en ve ? —
		vers es c’ades lo li dirai. —
	20	no farai, a la mia fe,
		si sabia c’a un tenen
		en fos tot’ Espanha mia ;
		mais volh morir de feunia
		car anc me venc en pessamen.
IV	25	Ja per me no sabra qu’eu m’ai
		ni autre no l’en dira re.
		amic no volh ad aquest plai,
		ans perda Deu qui pro m’en te ;
		qu’eu no·n volh cozi ni paren,
	30	que mout m’es grans cortezia
		c’amors per midons m’aucia ;
		mais a leis non estara gen.
V		E doncs, ela, cal tort m’i fai,
		qu’ilh no sap per que s’esdeve ? —
	35	Deus ! devinar degra oimai
		qu’eu mor per s’amor ! — et a que ? —
		al meu nesci chaptenemen
		et a la gran vilania
		per que·lh lenga m’entrelia
	40	can eu denan leis me prezen.
VI		Negus jois al meu no s’eschai,
		can ma domna·m garda ni·m ve,
		que·l seus bels douz semblans me vai
		al cor, que m’adous’ e·m reve ;
	45	e si·m durava lonjamen,
		sobre sainhz li juraria
		qu’el mon mais nulhs jois no sia ;
		mais al partir art et encen.
VII		Pois messatger no·lh trametrai
	50	ni a me dire no·s cove,
		negu cosselh de me no sai ;
		mais d’una re me conort be :
		ela sap letras et enten,
		et agrada·m qu’eu escria
	55	los motz, e s’a leis plazia,
		legis los al meu sauvamen.
VIII		E s’a leis autre dols no·n pren,
		per Deu e per merce·lh sia
		que·l bel solatz que m’avia
	60	no·m tolha ni·l seu parlar gen.