Appel, Carl. Bernart von Ventadorn, seine Lieder, mit Einleitung und Glossar. Halle a. S.: Verlag von Max Niemeyer, 1915.

Code: 070,021 Auteur: Bernart de Ventadorn Genre: Vers Numero: XXI

Ges de chantar no·m pren talans

I	1	Ges de chantar no·m pren talans,
		tan me peza de so que vei,
		que metre·s soli’ om en grans
		com agues pretz, onor e lau,
	5	mas era no vei ni non au
		c’om parle de drudaria,
		per que pretz e cortezia
		e solatz torn’ en no-chaler.
II		Dels baros comensa l’enjans,
	10	c’us no·n ama per bona fei.
		per so·n sec als autres lo dans,
		e negus om de lor no·s jau.
		edamors no rema per au,
		car be leu tals amaria
	15	qui s’en te, car no·s sabria
		a guiza d’amor chaptener.
III		De tal amor sui fis amans
		don duc ni comte non envei :
		e non es reis ni amirans
	20	el mon, que, s’el n’avi’ aitau,
		no s’en fezes rics com eu fau ;
		e si lauzar la volia,
		ges tan dire non poiria
		de be que mais no·n sia ver.
IV	25	Per re non es om tan prezans
		com per amor e per domnei,
		que d’aqui mon deportz e chans
		e tot can a proez’ abau.
		nuls om ses amor re no vau,
	30	per qu’eu no volh, sia mia
		del mon tota·lh senhoria,
		si ja joi no·n sabi’ aver.
V		De midons me lau cent aitans
		qu’eu no sai dir ; et ai be drei,
	35	que, can pot, me fai bels semblans
		e sona me gent e suau ;
		e mandet me (per qu’eu m’esjau)
		que per paor remania
		car ela plus no·m fazia,
	40	per qu’eu n’estau en bon esper.
VI		Bona domna, conhd’ e prezans,
		per Deu ayatz de me mercei,
		e ja no vos anetz doptans
		ves vostr’ amic fin e corau.
	45	far me podetz e ben e mau ;
		en la vostra merce sia ;
		qu’eu sui garnitz tota via
		com fassa tot vostre plazer.
VII		Fons Salada, mos drogomans
	50	me siatz mosenhor al rei.
		digatz li·m que Mos-Azimans
		mi te, car eu ves lui no vau.
		si com a Toren’ e Peitau
		e Anjau e Normandia,
	55	volgra, car li covenria,
		agues tot lo mon en poder !
VIII		Lo vers, aissi com om plus l’au,
		vai melhuran tota via,
		e i aprendon per la via
	60	cil c’al Poi lo volran saber.