Appel, Carl. Bernart von Ventadorn, seine Lieder, mit Einleitung und Glossar. Halle a. S.: Verlag von Max Niemeyer, 1915.

Code: 070,022 Auteur: Bernart de Ventadorn Genre: Vers Numero: XXII

Ja mos chantars no m'er onors

I	1	Ja mos chantars no m’er onors
		encontral gran joi c’ai conques,
		c’ades m’agr’ ops, si tot s’es bos,
		mos chans fos melher que non es.
	5	aissi com es l’amors sobrana,
		per que mos cors melhur’ e sana,
		deuri’ esser sobras lo vers qu’eu fatz
		sobre totz chans, e volgutz e chantatz.
II		Ai Deus, can bona for’ amors
	10	de dos amics, s’esser pogues
		que ja us d’aquestz enveyos
		lor amistat no conogues !
		Cortezia, mout etz vilana
		c’ad aquesta fausa gen vana
	15	fatz conoisser semblans ni amistatz,
		c’ar’ es cortes lo plus mal essenhatz !
III		Per merce prec als amadors,
		chascus per se cossir e pes
		del segle com es enoyos
	20	e can pauc n’i a de cortes !
		c’amors, pois om per tot s’en vana,
		non es amors, mas es ufana,
		et es enois, vilani’ e foudatz,
		qui no gara cui deu esser privatz.
IV	25	Si tot m’es vergonh’ e paors,
		blasmatz m’er d’Amor ; mas be·m pes,
		car aquest lauzars no m’es pros
		(e pois mos conortz no·n es res) ;
		qu’eu vei que de nien m’apana
	30	cilh que no·m vol esser umana ;
		e car no·n posc aver joi ni solatz,
		chan per conort cen vetz que sui iratz.
V		Chauzit ai entre las melhors
		la melhor qued anc Deus fezes ;
	35	mas tan a va cor e doptos
		qu’er’ ai leis, era no·n ai ges.
		que val aitals amors aurana,
		can ges no pot una setmana
		us bos amics ab l’autr’ estar en patz
	40	ses grans enois e ses enemistatz ?
VI		Tostems sec joi ir’ e dolors
		e tostems ira jois e bes
		(et eu no cre, si jois no fos,
		c’om ja saubes d’ira que·s es) ;
	45	qu’eu pert per falsa laus umana
		tal joi de fin’ amor certana
		que, qui·m mezes tot lo mon ad un latz,
		en preira·l joi per cui sui enjanatz.
VII		Bela domna, vostre socors
	50	m’auria mester, se·us plagues,
		que molt m’es mal’ aquist preizos,
		en c’Amors m’a lassat e pres.
		a Deus ! can malamen m’afana,
		can so que·m träis e m’enjana
	55	m’aven amar, si tot me pez’ o·m platz !
		era sai eu qu’eu sui apoderatz.
VIII		. . . . . . . . . . . . . . . . . . . . . . . . .
		. . . . . . . . . . . . . . . . . . . . . . . . .
		car de l’afan no me val amistatz
	60	tan qu’eu disses que sui melhs sos privatz.
IX		Messatgers, vai t’en via plana
		a mon Romeu, lai vas Viana,
		e digas li qu’eu lai fora tornatz,
		si mos De-Cor m’agues salutz mandatz.