Audiau, Jean. La Pastourelle dans la poésie occitane du Moyen Âge. Paris: E. de Boccard Éditeur, 1923.

Code: 569,029 Auteur: Anonyme Genre: Porquiera Numero: XXIV

Mentre per una ribiera

I		Mentre per una ribiera
		Sols anava, deportan,
		Vi de luenh gaya porquiera,
		Un tropel de porcz gardan;
	5	Sopdamen per una rega
		Aniey vas liey d'un garatg.
		Et hac son cors fer e lag,
		Escur e negre cum pegua;
		Grossa fo coma tonela,
	10	Et hac cascuna mamela
		Tan gran que semblet Engleza.
		Yeu, que la vi malsabeza,
		Cazec mi tota la brassa.
II		Ela'stec coma fadassa,
	15	Et yeu disshi·l: « Na Corteza,
		Bela res e gent apreza,
		Digatz me si n'etz piucela.
		En est mieg, jos sa gonela,
		Se grata fortmen e brega
	20	Lo sieu corcegas mal fag:
		Si·l pans no fo·l del gannag,
		Paregra·l tota la plega!
		E respondet entertan,
		Am boaral votz grociera:
	25	« Hom, per que·m vas enujan?
		Sec, de par Dieu, ta cariera! »
III		— « Toza, fi·m ieu, plazentiera,
		Per vos hai trag gran afan,
		Per que·us prec que volontiera
	30	Me digatz so que·us deman. »
		— « Senher, per fugir a brega,
		E per gandir a mal plag,
		Mas que no·m sia retrag,
		Dir vos o vuelh, sol que·m lega:
	35	Maritz ni'spos no·m capdela,
		Ni lunh temps planca ni cela
		No fuy d'ome, ni sosmeza. »
		— « Huey seretz, toza, repreza,
		Quar yeu say bo qui·us abrassa. »
IV	40	— « Del boyer no·m blasmatz, lassa!
		Quar jos terra fora meza,
		Gran temps ha, mas la gayeza
		De lui. Tan be caramela,
		M'esgauzish e·m renovela!
	45	Non es jorn qu'ab mi no bega
		A pot de barril, a rag,
		E ses lunh avol assag,
		Qu'entre nos ges no s'emplega. »
		— « Porquiera, segon semblan,
	50	Vos l'amatz d'amor entiera? »
		— « O, yeu, mais que porcz aglan,
		Ni cauls trueja porceliera! »
V		— « Sor, tant tez bela parliera
		Que totz m'anatz traforan.
	55	Prec vos qu'en cela falguiera
		Anem amdos deportan,
		Ans que mos languimens crega. »
		— « Senher, no crey d'aquest mag
		Me vejatz en aquel trag!
	60	Mal bossi fai qui·s nofega! »
		— « Quar pauc val, fi·m ieu, sor bela,
		Fivelos senes fivela,
		Valha·m la vostra franqueza. »
		— « Far me faretz gran fadeza,
	65	Bels Senher, quar vos am massa. »
VI		Soptamen ab mi·s la passa
		Qu'a pauc no·m fe gran fereza.
		— « Sor, pus tant sabetz de preza,
		Anem tendre la trapela
	70	La jos, en l'erba noela. »
		Las faudas se reversega
		Per miels anar ses empag,
		E menam de jos un fag,
		Et aqui tost ela·s plega.
	75	— « De la part, fi·m ieu, denan,
		Etz, toza, trop prezentiera,
		Per que no·m veyretz d'ogan
		Passar per vostra naviera. »
VII		— « Quar me vezetz solaciera,
	80	Senher, vos pessalz engan;
		E vuelh mais que lams me fiera
		Qu'ieu falhimen fes tan gran. »
		Son cami pren e tezega;
		Va s'en ab son gonel frag:
	85	Ampla fo que semblet mag!
		Mas al pas d'un riu lenega,
		Tan prozamen s'en capdela,
		Que tal colp de la maysshela
		Det ques aqui s'es esteza.
	90	Yeu que vi la gran apteza,
		Laysshe li tota la plassa.
VIII		Flors Humils, no si deslassa
		De vos purtatz ni beleza,
		E quar etz Flors de nobleza,
	95	Me dicta·l cor e·m martela
		Qu'es fols qui de vos s'apela.