Appel, Carl. Bernart von Ventadorn, seine Lieder, mit Einleitung und Glossar. Halle a. S.: Verlag von Max Niemeyer, 1915.

Code: 070,033 Auteur: Bernart de Ventadorn Genre: Canso Numero: XXXIII

Pel doutz chan que·l rossinhols fai

I	1	Pel doutz chan quel rossinhols fai,
		la noih can me sui adormitz,
		revelh de joi totz esbäitz,
		d’amor pensius e cossirans ;
	5	c’aisso es mos melhers mesters,
		que tostems ai joi volunters,
		et ab joi comensa mos chans.
II		Qui sabia lo joi, qu’eu ai,
		que jois fos vezutz ni auzitz,
	10	totz autre jois fora petitz
		vas qu’eu tenc, que·l meus jois es grans.
		tals se fai conhdes e parlers,
		que·n cuid’ esser rics e sobrers
		de fin’ amor, qu’eu n’ai dos tans !
III	15	Can eu remire so cors gai,
		com es be faihz a totz chauzitz,
		sa cortezi’ e sos bels ditz,
		ja mos lauzars no m’er avans ;
		c’obs m’i auri’ us ans enters,
	20	si·n voli’ esser vertaders,
		tan es cortez’ e ben estans.
IV		Cil que cuidon qu’eu sia sai,
		no sabon ges com l’esperitz
		es de leis privatz et aizitz,
	25	si tot lo cors s’en es lonhans.
		sapchatz, lo melher messatgers
		c’ai de leis, es mos cossirers,
		que·m recorda sos bels semblans.
V		Domna, vostre sui e serai,
	30	del vostre servizi garnitz.
		vostr’ om sui juratz e plevitz,
		e vostre m’era des abans.
		e vos etz lo meus jois primers,
		e si seretz vos lo derrers,
	35	tan com la vida m’er durans.
VI		No sai coras mais vos veirai ;
		mas vau m’en iratz e maritz.
		per vos me sui del rei partitz,
		e prec vos que no·m sia dans,
	40	qu’e·us serai en cort prezenters
		entre domnas e chavalers,
		francs e doutz et umilians.
VII		Huguet, mos cortes messatgers,
		chantatz ma chanso volonters
		a la rëina dels Normans.