Appel, Carl. Bernart von Ventadorn, seine Lieder, mit Einleitung und Glossar. Halle a. S.: Verlag von Max Niemeyer, 1915.

Code: 070,036 Auteur: Bernart de Ventadorn Genre: Canso Numero: XXXVI

Pois preyatz me, senhor

  

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

   

I	1	Pois preyatz me, senhor,
		qu’eu chan, eu chantarai ;
		e can cuit chantar, plor
		a l’ora c’o essai.
	5	greu veiretz chantador,
		be chan, si mal li vai.
		vai me doncs mal d’amor ?
		ans melhs que no fetz mai !
		e doncs, per que m’esmai ?
II	10	Gran ben e gran onor
		conosc que Deus me fai,
		qu’eu am la belazor
		et ilh me (qu’eu o sai).
		mas eu sui sai, alhor,
	15	e no sai com l’estai !
		so m’auci de dolor,
		car ochaizo non ai
		de soven venir lai.
III		Empero tan me plai
	20	can de leis me sove,
		que qui·m crida ni·m brai,
		eu no·n au nula re.
		tan dousamen me trai
		la bela·l cor de sê,
	25	que tals ditz qu’eu sui sai,
		et cuid’, et o cre,
		que de sos olhs no·m ve.
IV		Amors, e que·m farai ?
		si guerrai ja ab te ?
	30	ara cuit qu’e·n morrai
		del dezirer que·m ve,
		si·lh bela lai on jai
		no m’aizis pres de se,
		qu’eu la manei e bai
	35	et estrenha vas me
		so cors blanc, gras e le.
V		Ges d’amar no·m recre
		per mal ni per afan ;
		e can Deus m’i fai be,
	40	no·l refut ni·l soan ;
		e can bes no m’ave,
		sai be sofrir lo dan,
		c’a las oras cove
		c’om s’an entrelonhan
	45	per melhs salhir enan.
VI		Bona domna, merce
		del vostre fin aman !
		qu’e·us pliu per bona fe
		c’anc re non amei tan.
	50	mas jonchas, ab col cle,
		vos m’autrei e·m coman ;
		e si locs s’esdeve,
		vos me fatz bel semblan,
		que molt n’ai gran talan !
VII	55	Mon Escuder e me
		don Deus cor e talan
		c’amdui n’anem truan ;
VIII		Et el en men ab se
		so don a plus talan,
	60	et eu Mon Aziman !