Appel, Carl. Bernart von Ventadorn, seine Lieder, mit Einleitung und Glossar. Halle a. S.: Verlag von Max Niemeyer, 1915.

Code: 062,001 Auteur: Bernart de la Font Genre: Canso Numero: -

Leu chansonet' ad entendre

I	1	Leu chansonet’ ad entendre
		ab leu sonet volgra far,
		coindet’ e leu per apendre
		e plan’ e leu per chantar,
	5	quar leu m’aven la razo,
		e leu latz los motz e·l so ;
		per so m’eu vuelh leu passar,
		quar de plan e leu trobar
		nulhs hora no·m pot leu reprendre.
II	10	Totz hom qui leu vol mesprendre,
		leu er mespres de parlar ;
		e qui trop leu vol contendre,
		ben leu trobar-n’a son par ;
		e qui mal ditz a lairo,
	15	en dobl’ en deu guizardo
		per dreg a prezen cobrar ;
		mas yeu per negun afar
		no·m vuelh en maldir emprendre.
III		L’escut e·l basto vuelh rendre
	20	e·m vuelh per vencut clamar
		ans que ves dompnas defendre
		m’avenha ni guerreyar.
		per sola leys, cuy hom so,
		dey aver franc cor e bo
	25	per totas dompnas honrar,
		e si no·m ditz mon pezar,
		yeu no·m dey a lieys atendre.
IV		Non dey mos belhs digz despendre
		en bona dompna blasmar.
	30	si·l cor m’en devia fendre,
		no m’en sai estiers venjar
		mas que l’an querre perdo,
		qu’apres ai sen de Cato :
		qu’ab gent sufrir dey sobrar
	35	mon amic, s’iratz mi par,
		qu’aissi torna·l fuecx en cendre.
V		Si fin’ amors vol deyssendre
		en leys que·m fai tant amar,
		qu’ins el cor merce li’ngendre,
	40	far hi pot son ben-estar.
		pus m’a mes en sa preizo,
		no·l lays aver cor fello
		ves mi (que res ajudar
		no·m pot), qu’elha·m desampar,
	45	qu’a merce no·m vuella prendre.
VI		Chanso, vai midons preiar
		que son ben fag plus tarzar
		no·m vuella ni trop quar vendre ;
VII		Qu’ieu no l’aus merce clamar,
	50	mas a sol lo sospirar
		pot ben mon fin cor entendre,
VIII		S’ie·m puesc a sos pes gitar,
		ja no m’en volrai levar
		tro·m denh sas belas mans tendre.