Appel, Carl. Bernart von Ventadorn, seine Lieder, mit Einleitung und Glossar. Halle a. S.: Verlag von Max Niemeyer, 1915.

Code: 065,001 Auteur: Bernart de Pradas Genre: Canso Numero: -

Ab cor lial, fin e certa

		Orthographie nach C.
I	1	Ab cor lial, fin e certa
		franc e verai, de bona fe,
		sierf lai midons, e pro no·m te.
		mala sierf selh que grat no·n a.
	5	amada l’ai pus anc la vi,
		e no·n aten nulh guizardo.
		mas que·l plagues, et agra·n pro.
		azaut mi pres, gen mi trahi.
		ab semblant cug et ab cor cru
	10	gratar mi fai lai on no·m pru.
II		Cossi que·m me, no·lh serai vas,
		q’un’ hora m’en venra us bes,
		que, si·l platz, penra li·n merces.
		e sitot s’es er sobeiras
	15	sos pretz valens e cars e fis,
		ges per aitan no sui doptos
		que bos esfortz no·m sia pros.
		e pus tan rica m’a conquis,
		no·m cug morir de joy dejus,
	20	que bona fes salva reclus.
III		Amors no guarda pro ni dan,
		mas lai on vol, aqui s’enpren.
		non quier cosselh, mas son talen,
		que so que·l platz, vol metr’ avan.
	25	e pus a pres home . . . .
		ni l’a pauzat la ma el fron,
		vergonha·l tolh e sen e son ;
		e qui·l castia ni·l reprin,
		adonc s’abat el plus prion ;
	30	e vol totz sols venser lo mon.
IV		Quan plus m’esfortz, e meyns mi val,
		que penre cug tan ric auzel
		qu’ades mi fug, on plus l’apel.
		mas no m’en cal, si·m trac greu mal,
	35	que tan servisc en luec gentil
		que tot m’es belh, quant elha vol.
		e si m’acuelh mielhs que no sol,
		a mon dan giet, neys s’eron mil,
		fals lauzengiers ab lur ordul,
	40	. . . . . . . . . . . . . . . . . . . . ergul.
V		Doussa domna, ab dous esguar
		no·m adoussetz vostre dur fer,
		don suy nafratz ! a morir m’er !
		mas merce dei ab vos trobar,
	45	que nulha ren tan non dezir
		cum vos sola, endreg d’amor.
		cauzida·us ai per la gensor.
		si per aisso·m voletz aucir,
		res no sai a cuy m’en rancur.
	50	si ! a vos, oc, en cuy m’atur !