Appel, Carl. Bernart von Ventadorn, seine Lieder, mit Einleitung und Glossar. Halle a. S.: Verlag von Max Niemeyer, 1915.

Code: 065,002 Auteur: Bernart de Pradas Genre: Canso Numero: -

Ai! s'ieu pogues m'aventura saber

		Orthographie nach C.
I	1	Ai ! s’ieu pogues m’aventura saber
		lo jorn qu’ieu vinc, pros dompna, denant vos,
		los huelhs e·l cor mi clauzera, per ver,
		quez ieu no vis vostras bellas fayssos
	5	ni non auzis vostre parlar plazen
		ni remires vostr’ amoros cors gen,
		qu’el fuec d’amor mi fai murir e viure.
II		Dieus ! per que·m dis tan avinen plazer ?
		que lai mi falh on mi ve plus coitos.
	10	joy mi promet, e quan lo cug aver,
		suy ne plus luenh no vey dels huelhs amdos.
		ay ! si er ja qu’ilh m’aya chauzimen ?
		oc, ben leu lai, quant hom el monumen
		m’aura pauzat, fara mon nom escriure !
III	15	Ai ! ta mal n’ay, segon mon bon esper,
		cum soudadiers, qu’es del tot bezonhos,
		que fer en torr, de que no·s pot mover,
		e quan re quier, hom li’s de belh respos
		e no·n a als. Tot atressi m’en pren,
	20	qu’ieu quier e quier, e·l joys va·m defugen
		que m’es promes, que cug penre desliure.
IV		Et ab lieys meynhs que m’en degra valer
		paratges, pretz, beutatz, ricx cors joyos
		e sa valors, que fai mout gen saber
	25	en ricas cortz de reys, d’autres baros,
		e notz m’en mais quar l’am tan francamen ;
		e Dieus vuelha, blasmes non l’an seguen,
		qu’om la·n repte sai, e lai part Cogliure.
V		On plus hi a dompnas, mais sap valer
	30	denan totas, on mais n’i a de pros ;
		e lauzor a de totz, ses retener,
		que la vezon gensar totas sazos.
		e sa beutatz gens’ ades per un cen,
		on mais hi a dompnas e belh joven,
	35	pascor, estiu et yvern freg ab giure.