Appel, Carl. Bernart von Ventadorn, seine Lieder, mit Einleitung und Glossar. Halle a. S.: Verlag von Max Niemeyer, 1915.

Code: 234,011 Auteur: Guilhem de Saint Leidier Genre: Canso Numero: -

Estat aurai estas doas sazos

		Orthographie nach A.
I	1	Estat aurai estas doas sazos
		que non chantei, e fatz i mon dampnatge ;
		mas er m’agr’ ops bos vers o tals chanssos,
		c’agrades lieis, cui fatz lig’ omenatge ;
	5	et ai l’amada, puois son pretz auzic,
		e ren no·n ai mas quan lo bon esper ;
		pero sivals si la pogues vezer,
		ab sol l’esgart mi pogr’ ill faire ric.
II		Ab sol l’esgart qe·m mostres amoros,
	10	m’agr’ il tant faich, per qu’ieu dic gran outratge,
		que lo sieus cors es tant valens e bos
		que, s’e·y enten, be sai que fatz follatge.
		dompna, s’ieu anc per trop amar faillic,
		no m’en devetz per orgoillos tener ;
	15	mainz n’a el mon qu’an aqel eus voler,
		c’anc mi ni lor fors las denz non issic.
III		.  .  .  .  .  .  .  .  .  .  .  .  .  .  .  .  .  .  .
IV		E pois tant es vostre pretz cabalos,
		ben es doncs dregz, c’aiatz en seignoratge
		un trobador qe·us chan en plan perdos,
	20	sol que·l deignetz culhir en agradatge.
		aquel sui ieu, q’anc re mais no·us queric ;
		e s’ieu dic ben, que vos vengn’ a plazer,
		o si que no, que m’o fassatz saber.
		puois pendetz mi, s’ieu ja mais cansson dic.
V	25	Cansson no dic, dompna, mas endreich vos,
		a cui non aus trametr’ autre messatge
		mas dels sospirs q’ieu fatz de genoillos,
		mans jointas, lai on sai qu’es vostr’ estatge ;
		q’el mon non ai tant mortal enemic,
	30	ab cui trobes o aize o lezer
		q’ieu vos pogues cubertamen vezer :
		anc a seignor mieills de cor non servic.
VI		Si per servir fos tant aventuros
		c’umilitatz fraisses tant son paratge
	35	q’us doutz ales del sieu gen ris mi fos
		dolsetamen aissis e mon coratge :
		si anc nuills hom per ben amar fenic,
		doncs fenir’ ieu, si·m pogues eschazer,
		mas pel respieich q’ieu pogues mais aver,
	40	visquer’ ieu pois ben leu al ver afic.
VII		Un fol afic ant pres ist enveios
		encontr’ amor, e fant gran vilanatge :
		s'una dompna lauzatz que sera pros,
		clamaran vos feignedor, per usatge.
	45	ieu no m’en feing, mas depuois q’ieu la vic,
		vuelh sas onors e son pretz mantener,
		sivals d’aitan c’autra non a poder
		qe·m don lo joi qu’anc plus fort m’abellic.
VIII		Lo majer gaug qu’anc en mon cor sentic
	50	fon en durmens, qu’ieu somnhava un ser
		que·m laissava sas mas nudas tener.
		murir cugei del joy, quan m’esperic.
IX		Amics Bertrans, digatz Bertran q’eu dic :
		trop s’i venget, si·l vengues a plazer ;
	55	e del sieu tort lais ma merce venser,
		c’uoill no fant re a cel qui no la vic.