Appel, Carl. Bernart von Ventadorn, seine Lieder, mit Einleitung und Glossar. Halle a. S.: Verlag von Max Niemeyer, 1915.

Code: 234,015 Auteur: Guilhem de Saint Leidier Genre: Canso Numero: -

Per Crist, Amor, en gentil luoc cortes

		Orthographie nach f.
I	1	Per Crist, Amor, en gentil luoc cortes
		saupest assire tot mon cor e mon sen,
		per qu’ie·us o dei mais grazir lonjamen
		qu’ieu no·m cujara, esdevenir pogues ;
	5	que la gensor m’aves fait abellir
		que si’ el mon en fait ni en semblan.
		tant es bella que hi conosc mon dan,
		c’ap sol l’enveya cre que·m n’er a murir.
II		Ben sai del mon que, s’a chauzir agues,
	10	qu’ieu leis chauzira (si·s feran d’autres cen !),
		per qu’ieu am mais de leis lo lonc aten
		que de nuil’ autra ren que far mi pogues,
		mais trop ai mes autamen mon dezir,
		per c’ai paor qu’ela·m torn en soan ;
	15	mas ieu non puesc capdelar mon talan
		c’ades non vuelha lo miels del mont servir.
III		Ric joy e car (e volgut e defes
		c’ab cortezia monta son pretz valen)
		ai ben trobat, qui que l’anes queren.
	20	e qui que l’aia, per mi non o dic ges,
		qu’ieu non l’aurai, ni no·m deu avenir.
		pero be sai que, si Dieus m’ames tan
		que de s’amor agues ni tan ni can,
		sol que ren n’aia, sia·s el sieu chauzir.
IV	25	Qui’n ric amor met son cor e son pes,
		si tot li tarza, ric guizardon n’aten.
		qui ric seinhor pot servir lonjamen,
		si tot bistensa, pueissas leu pren merces.
		el loi pot mais en sol un jorn grazir
	30	e far honor, que cen paubr’ en un an,
		per qu’ieu n’aten honor e joya gran,
		qu’en ric parage ai pauzat mon albir.
V		Preguara la, si sol a leis plagues
		que·m consentis un celat parlamen,
	35	car s’ieu la vauc vezer tot a prezen,
		diran mesonjas maint envios plaides.
		et enaissi pot ben esdevenir
		enans del fag, on cascuns a pueis dan ;
		e si fossan acordat des aban,
	40	abdui se pogran ab mens de bruit jauzir.
VI		D’una ren fan domnas gran nesies :
		c’ab lonc enquerre fan lur joi conoissen.
		cant hom las pregua, et ill n’auran talen,
		et es vejaire c’an ben lur amor mes,
	45	per que·n fan plus de paraulas auzir ?
		car asatz son saubut li devinan,
		que·n diran mais gran ren qu’elas non fan,
		que per enveya an fait mant joi partir.
VII		Chansoneta, vai·m a mon Bertran dir
	50	que·l prec que·t fassa al sieu Bertran auzir.