Javascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.com

* Introduction
* Notice Bibliographique

* Présentation
* Bibliographie
* Témoignage
* Appareil critique
* Notes
* Traductions
* Images

Longobardi, Monica. I vers del trovatore Guiraut Riquier. "Studi Mediolatini e Volgari", 29 (1982-1983), pp. 17-163.

Code: 248,063 Auteur: Guiraut Riquier Genre: Vers (Planh) Numero: IV

Ples de tristor, marritz e doloiros

   
PLANCH QUE FE GR. RIQUIER DEL SENHOR DE NARBONA, L'AN MCCLXX EN DEZEMBRE
     
I   Ples de tristor, marritz e doloiros
    comens est planch per lo dan remembrar
    e per lo dol, que tart deu oblidar,
    que Narbones soste tant angoyssos,
  5 per la greu mort del senhor de Narbona,
    del vescomte n'Amalric mo senhor,
    don deu aver trebalh tota gens bona
    e la sua pus lonc temps e maior.
     
II   Qui senhor pert aver deu gran dolor,
  10 quant l'a humil e franc, ses forsa far
    e·l pot ab be a son voler menar,
    ez es senhers naturals ab honor.
    Doncx perdut l'a Narbones e Narbona,
    don deu esser totz le pobles ploros,
  15 quar elh era la pus nobla persona,
    per dreg dever, que d'est lengage fos.
     
III   Si de poder estes tant autoros
    quon de dever, fazen son benestar,
    fera de si per tot lo mon parlar,
  20 per ardimen, per sen e per faitz bos,
    qu'ab Narbones tot sol ez ab Narbona
    s'es d'enemicx honratz, don a lauzor
    elh e sas gens, qui liautatz razona
    qu'a senhor an ab bona fe amor.
     
IV 25 Anc nulh vil fag vergonhos, ab follor
    ni ab enjan, no·l vi hom comensar,
    ans s'es volgutz ab liautat menar,
    part son poder, fazen faitz de valor;
    e plazia·l tant le faitz de Narbona,
  30 qu'autres estars non l'era saboros,
    ni anc nulh temps, ab voluntat fellona
    a son poble non fon contrarïos.
     
V   Dieus de salvar las armas poderos,
    per merce·us prec que denhetz perdonar,
  35 Senher, si·us platz, a l'arma, e luec dar
    en paradis, entre·ls sans, pres de vos,
    de mossenhor n'Amalric de Narbona,
    e son poble gardetz de deshonor
    e sos efans: aissi quom dreitz o dona,
  40 tengan em patz lur terra, ses clamor.
     
VI   Si·s pessa ben le pobles de Narbona
    quals dans li es la mortz de mossenhor,
    del conortar leu non a razon bona,
    ans, l'a mout gran que·n sospir e que·n plor.
     
VII 45 Aissi cum suelh del senhor de Narbona
    chantar ab gaug, ne chanti ab dolor,
    quar l'ai perdut, de que ai ma persona
    ab marrimen, plena de gran tristor.

 

 

Institut d'Estudis Catalans. Carrer del Carme 47. 08001 Barcelona.
Telèfon +34 932 701 620. Fax +34 932 701 180. informacio@iec.cat - Informació legal

UAI