Jeanroy, Alfred; Salverda de Grave, Jean-Jacques. Poésies de Uc de Saint-Circ. Toulouse: Imprimerie et Librairie Édouard Privat, 1913.

Code: 457,001 Auteur: Uc de Sant Circ Genre: Canso Numero: V

Aissi cum es coinda e gaia

I	1	Aissi cum es coinda e gaia
		E cortesa e plazens
		Ed azaut’ a totas gens
		La bella de cui eu chan,
	5	M’es ops que d’aital semblan
		Cum ill es fassa canso,
		Coinda e gaia ab plazen so,
		Que li man lai que·l an dire
		Lo desire
	10	Que ieu ai
		De vezer son gent cors gai.
II		Desir n’ai ieu e cossire
		E pessamen e esglai
		Car non la vei, et esmai ;
	15	C’anc nuilla sazo non fo,
		S’ieu vis sa gaia faisso,
		Que anc trebailla ni dan
		Sentis ni mal ni affan,
		Aitant doussamen m’apaia
	20	Qanz q’ieu aia
		De turmens
		Sos francs cars humils parvens.
III		Ja no·s cuit qez eu m’atraia
		Vas autra, qe·ls cors e·l sens
	25	E·l desirs e·l pessamens
		Si acordon d’un talan,
		C’usquecs la vol e la blan,
		Car ges oblidat non so
		L·dig ni·l faich ni·l si ni·l no
	30	Ni·l beil semblan ni·l doutz rire
		Ni·l sospire
		Ni l’essai
		Ni·l doutz man ni·l plazen plai.
IV		Sos amics e sos servire
	35	E sos hom sui e serai,
		E dompna vista non ai
		Nuill luoc, ni sai on eu so,
		Que mais de lieis un cordo
		Non ames o sol un man,
	40	Qu’ieu sai preses de joi tan
		Cum pren cel que si donz baia
		Ni qe·i jaia,
		Que cozens
		M’es totz autres gauzimens,
V	45	Ges per l’avol gens savaia
		Cui desplatz jois e jovens,
		Ni per los mieus malvolens
		Que van mos mals encercan
		No m’an mon joi amerman ;
	50	Anz li dic que per razo
		Deu per els voler mon pro,
		C’om deu faire don s’azire
		E que tire
		A cels lai
	55	A cui sos plazers desplai.
VI		Dalfin, de clara razo
		Ai er faicha ma chansso,
		Per so que puosca eslire
		E devire
	60	Cum eu ai
		Vas lieis mon fin cor verai.