Jeanroy, Alfred; Salverda de Grave, Jean-Jacques. Poésies de Uc de Saint-Circ. Toulouse: Imprimerie et Librairie Édouard Privat, 1913.

Code: 457,034 Auteur: Uc de Sant Circ Genre: Canso Numero: VI

Servit aurai longamen

I	1	Servit aurai longamen
		Humils, francs sers e leials
		Amor, don ai pres grans mals,
		Ira, pena e tormen,
	5	Greu maltraich ses nuill’ esmenda ;
		Et ancar vol q’ieu atenda
		Amors sa dura merce,
		Per saber si n’aurai be
		Suffren anz c’altrui mi renda.
II	10	Amarai doncs finamen,
		Puois fis amars no m’es sals ?
		Non ausaria esser fals
		Vas lieis c’aisi·m vai volven ?
		Conseill m’es ops q’ieu en prenda. —
	15	Mas Amors ditz q’anz mi penda
		Qe ja li menta de re. —
		Mas dreitz es c’ab aital fe
		Cum ill compra q’ieu li venda.
III		Mas ges vas lieis no·m deffen
	20	Razos, dreitz, amors ni als,
		E si·l platz mos dans mortals
		E lo sieu qier eissamen,
		Non creza q’ieu l’o contenda,
		Qu’eu viu de paubra prevenda ;
	25	Que non ai poder en me,
		Car cill l’a c’a·l cor ab se,
		E no voill qu’om li·m deffenda.
IV		Esfortz fatz doncs car m’enten,
		Ni car i perc mos jornals,
	30	En lieis, don vista sivals
		Ni pres ni loing non aten,
		Si doncs no·il platz que s’estenda
		En lieis merces e·i dissenda ;
		Esser pot, mas non o cre,
	35	Car qui·ls mieus mans non rete
		Non par que los sieus me tenda.
V		Huoills clars ab boca rizen,
		Denz plus blancas c’us cristals ;
		Neus blanca non es aitals
	40	Cum sos cors rics de joven ;
		Blanca, vermeilla, ses menda
		Es la cara sotz la benda ;
		Tot hi es cant i cove,
		Honrada sor tota re,
	45	Si que no·i ha c’om reprenda.
VI		De ma vida·m faitz esmenda,
		Bella de dura merce,
		Ab sol que soffratz de me
		Qu’eu per vos al cel entenda.
VII	50	A·n Savaric, part Enenda,
		Chanssos, vai dir de part me
		Qez el sabra ben, si·t ve,
		Setaing que fuga o atenda.